ڕۆجیاروو هه‌ورامانی
بنویسمێ به‌زوانی هه‌ورامی،بوانمێوه‌به‌زوانی هه‌ورامی که‌ئاڵاو قه‌ڵه‌می نه‌بڕیه‌ینه‌ باڵاوهیچ مێلله‌تێویه‌ره. محه‌مه‌دمسته‌فازاده
درباره وبلاگ


ڕۆجیاروو هه‌ورامانی په‌لیانێوه‌ی شه‌خسیه‌نه‌ که‌ دلێشه‌نه‌ ژیونامه‌و وێم ، هۆنیێ ، داستانێ گۆلالێ ، قسێ قه‌ذیمیا و هه‌رچێو ئاما سه‌روو ویر و ئاوه‌زیم منویسوو ئیشه‌ڵڵا وانه‌رێ ئازیزێ که‌ڵکش چنه‌ هۆرگێرا.

(ئیبراهیم شه‌مس)

ڕۆجیار = شمس



مدیر وبلاگ : نسیم هه‌ورامان

په‌ی که‌سێ بمره‌ په‌ری مه‌رذه‌ بۆ   -  ئاذ جه‌ تۆ به‌ته‌ر ئیمان هه‌رذه‌ بۆ

وه‌ڵێ گرذ چێوی مشیۆ ماناو په‌ری مه‌رذه‌ی بزانمێ

په‌ری مه‌رذه‌ به‌ که‌سێوی ماچا عه‌جننا پێکا بۆ یا په‌ریا ئازاره‌شا پنه‌ یاونا بۆ ئی شه‌خسه‌ حاڵه‌تێوی زایف و جسمێوی له‌ڕ و بێ گیانش هه‌ن و ڕوێو چن جارێ بێ ئێختیار گنۆ و گنۆنه‌ گیانکه‌نشت .

مه‌به‌ست ئه‌چی شێعرێ ئینه‌نه‌ که‌ مشیۆ په‌ی که‌سێوی مری ئاذێچ په‌ی تۆ مرۆ په‌ی که‌سێوی دڵ سۆچنی و گنیه‌نه‌ خه‌فه‌تێوی قۆرس ، ئاذیچ چه‌ولاوه‌ پێسه‌و تۆش پنه‌ ئاما بۆ . ئه‌ننا با حه‌ر تۆ خه‌فه‌توو ئاذی بوه‌ری با جه‌ ده‌رذه‌و دووریشه‌نه‌ پێسه‌و شه‌معێ تاویه‌یه‌وه‌ و ئاذ چه‌ولاوه‌ دلێ که‌یفوو وێشه‌نه‌ بۆ :  تۆ نه‌ تۆی باغچه‌ی وه‌سڵ دڵبه‌ر دا   - من نه‌ پێچ گێج ده‌ریای ماته‌م دا





نوع مطلب :
برچسب ها :
لینک های مرتبط :
ویس ساڵێن خه‌فه‌ت موه‌روو چی ویه‌رذه‌و هه‌ورامانی ویر شیه‌نه‌وه‌ و ئیسه‌ سه‌روو ئینه‌یه‌ که‌ هه‌ورامان زوانا یا له‌هجه‌ن مشیۆ گژیه‌یمێ ئه‌گه‌ریچ یۆ واچۆ له‌هجه‌ن وێما کۆشمێوه‌ خافڵ چینه‌یه‌ ته‌ماموو گێچه‌ڵا و ئاچێوێ زه‌ربه‌شا دان زوانه‌که‌ی ، وێما بیێنمێ و نه‌ که‌سێوته‌ر.

شه‌وێ وه‌ڵینه‌ لوایمێ شه‌ویاری په‌ی یانه‌و قه‌ومێویما . کناچێوه‌شا هه‌نه‌ گه‌ورێنه‌ ڕه‌نگا ته‌مه‌نش جه‌ ویسی ترازیابۆ چنی کۆڕه‌که‌یما (سپێهر) گه‌مه‌ که‌رێ . نیێنه‌ ده‌موو سپێهری که‌ پنه‌ش واچۆ خاله‌ . مه‌سه‌ڵه‌ن چێوش نیشانه‌ دێ واچێ ئینه‌ په‌ی دۆخته‌را بۆ ئینه‌ په‌ی پسه‌را بۆ . ئا‌نه‌ په‌روانه‌ن و ئینه‌ که‌بووته‌ره‌ن ڕوه‌م که‌رذه‌ کناچه‌کێ واتم تۆ گیانوو وێت ئانه‌ چی پاسه‌ قسێ که‌رێ گوایا ئه‌ذا و تاته‌ی خالێس هه‌ورامیت زوانه‌که‌شا ڕێک نیشانه‌ نه‌ذه‌ینی؟! تاته‌ش ماچۆ وه‌ڵڵا هه‌رچی ئی زارۆڵێ پێسه‌ قسێ که‌را ماچی شه‌قێم مذا چۆری چێش که‌روو ده‌سه‌ڵات نیا. کناچه‌کێ ماچۆ ئه‌ی چێش واچوو  واتم من حه‌ز که‌روو کۆڕه‌که‌م فارسی ، کۆرذی ،ئینگلیسی ، هه‌ر زوانێوته‌ر یاذ گێرۆ. وه‌لێم مشیۆ ئه‌وه‌ڵ زوانوو ئه‌ذاییش به‌ ڕێکوپێکی فێر بۆ دماوه‌ زوانی ڕه‌سمیش و ئه‌وزوانه‌کاته‌ری. مشیۆ واچی ئینه‌ په‌پووله‌ن به‌فارسی ماچا په‌روانه‌ و... کۆره‌که‌یچشا که‌ ساحیبوو ژه‌ن و زارۆڵه‌یا ماچۆ کا‌که‌ ئیبراهیم به‌خوا شمه‌ وێتا شه‌که‌ت که‌ردێ گه‌ره‌کتا بۆ گه‌ره‌کتا نه‌بۆ تازه‌ نه‌سڵوو جوانی پێسه‌شه‌ سه‌ر ئامان و ئه‌جۆشا زوانه‌که‌شا زوانێوی دماکه‌وته‌و جه‌نگه‌ڵی و که‌شیا و حه‌ر که‌س پی زوانه‌یه‌ قسێ که‌رۆ پنه‌ش ماچا دێهاتی و به‌ خاتره‌و ئینه‌یه‌ عه‌یبه‌کێش پۆژیاره‌ ئامه‌ینێ نیانشا ده‌موو زارۆڵه‌کاشا به‌ تاته‌ی واچا بابایی و به‌ ئه‌ذه‌ی واچا مامانی و به‌ مه‌تیێ واچا خاله‌ ‌ په‌رسام ئازیز گیان ئه‌ی وێت چێش ماچی؟! واتش وه‌ڵڵا منیچ نه‌زه‌ره‌م ئینێنه‌ زوانێو تا دووریسان ‌و ئه‌ولا بڕ نه‌که‌ر و چه‌و لایچه‌و تا ته‌وێڵێ ، ئانه‌ زوان نیا و ئه‌گه‌ریچ زوان بۆ خوا بڕۆش.

حیچم په‌ی ناما واچوو  به‌ڵام ئێسمه‌وه‌ و زانام  و به‌ یه‌قین زانام ترێشته‌که‌ ئینا ده‌سوو وێماوه‌ و وێمانمێ خه‌ریکێنمێ ئی درخته‌ نازاره‌ و پڕ سه‌مه‌ره‌یه‌ جه‌ بنه‌نه‌ بڕمێ . ئه‌رێ برا کێ ئامان دلێ یانه‌که‌یما و کێ که‌له‌به‌ره‌ش ونه‌ گێرتێنمێ به‌ مه‌تیێ مشیۆ واچمێ خاله‌ وه‌ یا به‌ به‌ تاته‌ی واچمێ بابایی ؟!!!

وه‌ڵڵا ئه‌گه‌ر پێسه‌ بۆ و وه‌رش ئینه‌ بۆ ، ماچا ویس ساڵێته‌ر زوانوو هه‌ورامی مه‌مه‌نۆ من ماچوو ڕه‌نگا ده‌ساڵێچ بڕنه‌که‌رۆ . که‌وتانێ یاذوو کاکه‌ محه‌مه‌د مسته‌فازاده ی ڕه‌حمه‌تی زانام ئاکه‌ڵه‌ پیاوه‌ حه‌ر ئی خه‌فه‌تا کۆشت .بۆ دیار ئی مێراقه‌ گڵوه‌و ئێمه‌یچ گێرۆ و ئی خه‌فه‌ته‌ جه‌ به‌ینما به‌رۆ.





نوع مطلب :
برچسب ها :
لینک های مرتبط :
نـازارم  ئـازیــز  ئــازیــز تـــه‌رینــــــم

ڕۆشناو چه‌مه‌کام عێشق و ئه‌وینـم

عێشقت  خیاڵه‌ن جه‌ خیاڵ وه‌شته‌ر

تۆ له‌یل و ئه‌من جه‌ مه‌جنوون به‌ته‌ر

وه‌شه‌ویسی تۆ جه‌ حه‌د ئه‌و ده‌ره‌ن

ئانه‌ فـه‌دای تۆن،دڵه‌ن هه‌م سه‌ره‌ن

وه‌خت خه‌و که‌چه‌م منیه‌و وه‌ڕوی هه‌م

عه‌کسی ڕۆخسارت ماوه‌روو وه‌ چه‌م

خیاڵی وه‌سڵت جـه‌ خـه‌و بۆ عــه‌یان

ئینــانا چــه‌نیت شــه‌و هــه‌تا بــه‌یان

سه‌حه‌رکه‌ هۆرزوو خیاڵ بیه‌ن گرذین

مــه‌یوه‌ ئه‌و یاذم به‌ذ به‌دختی وه‌ڵین

مـن هه‌ر جه‌ ئه‌زه‌ڵ خـه‌فه‌ت بار بیانا

بـه‌ کرۆڵـی و نه‌حسـی گـرفتار بیـه‌نا

ئیســه‌یچ کـه‌ دڵم به‌ تۆ وه‌ش که‌رذن

به‌ خامه‌ی عێشقت تۆغرام ڕه‌ش که‌رذه‌ن

به‌ڵام ئی عێشقه‌ وه‌سڵش عه‌به‌سه‌ن

ئاخـــر و ئۆخــرش بڕیای نـه‌فـه‌ســه‌ن


 ڕۆجیار    20-1-1392





نوع مطلب :
برچسب ها :
لینک های مرتبط :
جمعه 16 فروردین 1392 :: نویسنده : نسیم هه‌ورامان

ئی شێعرێ په‌ی ئازیزیوی بۆ که‌ به‌ینێوا دیذه‌ش جه‌ من پێوارا و دیه‌یش بیه‌ن به‌ حه‌سره‌تێوی فره‌ گه‌وره‌ و  په‌ژاره‌و دووریش ئینا دڵمه‌نه‌ و  خه‌ریکا هه‌ر ڕۆ زامێم کۆلنۆوه‌ . ئی ئازیزه‌ گوایا ئاذیچ تووشوو سه‌خڵه‌تی ئامان و منیچ جه‌ خه‌موو ئاذیه‌نه‌ سه‌رم وه‌نه‌ شیویان .

ئیسه‌ که‌ نه‌ورۆزا قه‌رارا گرذ چێو تازه‌ بۆوه‌ جه‌ خوای گه‌وره‌ ئینه‌مه‌ ڕجان که‌ دڵوو ئی ئازیزه‌یچه‌ به‌ نووروو وێش په‌رذاخ که‌رو  و وه‌ره‌تاڤی تازه‌و ڕۆجیاری ملوو ژیوایشه‌ره‌ تاونۆ .  من تا ئاڕوه‌ مروو چه‌مه‌ڕاو ئه‌وه‌ ئامایشه‌نا

ئازیز نــه‌ورۆزه‌ن جــه‌ژن و شـادیه‌ن

به‌خــوا دڵـه‌کـه‌و من بێ قـه‌راریه‌ن

بــێ قــه‌راری مـن دووری له‌یلمه‌ن

ده‌روون ئاهی سـه‌رد نه‌وا وه‌یلمه‌ن

لـه‌یل نگـــه‌رانه‌ن منیچ جـه‌و به‌ته‌ر

ئه‌ندامم جه‌ خه‌م خه‌م بیه‌ن یه‌کسه‌ر

ئـــازیزم دنیــــا گـــۆزه‌ری عـه‌مـره‌ن

ئه‌رشادی ئه‌رخه‌م هه‌ردوو ویه‌رذه‌ن

ئیســه‌ جــه‌ خـــوای ئینـه‌مه‌ن ڕجا

خــــه‌مانـــی وه‌ڵین گـــرذ بلا به‌ با

خـــه‌م و خـه‌جاڵه‌ت گردین بار که‌رۆ

به‌ جیــاتیش شــادی مه‌نزڵ بکه‌رۆ

ئێتر نه‌وینوو ئاهی ســه‌رد کێشی

یا ده‌س به‌ ئه‌ژنۆ به‌ خــه‌م بنیشـی

کـــه‌لامـــی ئاخر نوور‌وو چـــه‌مانم

جـــه‌ کانگاو دڵیــه‌و ئینــه‌ن به‌یـانم

"شه‌مس"  تا ئا ڕوه‌ زیننه‌ی زه‌مینه‌ن

چــه‌مــه‌ڕای دیدار ئه‌و نازه‌نینــه‌ن


ئێبراهیم شه‌مس (ڕۆجیار) 1-1-1392





نوع مطلب :
برچسب ها :
لینک های مرتبط :
باحسوو ژه‌نی و ژه‌ن ئارذه‌ی و ژه‌ن ته‌ڵاق دای جه‌ فه‌رهه‌نگو فۆلکلۆریکوو هه‌ورامانیه‌نه‌  - ئی باحسێ جه‌ ده‌فته‌رێومه‌نه‌ که‌ جه‌ ساڵه‌و 1372 یادداشتێم که‌رێنێ به‌رم ئارذێنێ


ژه‌نی بذه‌ به‌ ژه‌ن مه‌رذه‌ی

پێســه‌و گۆڵی په‌روه‌رذی

ژه‌نی نه‌ذه‌ی به‌ ژه‌ن ته‌ڵاق ده‌ری

ئینـــه‌ نه‌بــۆ با یــۆته‌ری

که‌سێو که‌ هه‌ر وه‌خت هه‌وه‌سش کریۆ ژه‌نی بارۆ و ته‌ڵاقش بذۆ ئێشتێبه‌یوه‌ فره‌ گه‌ورێنه‌ ئه‌گه‌ر ژه‌نیش بذه‌ی چونکای هیچ ژه‌نێوه‌ چنی ئی جۆره‌ پیه‌یا زێنده‌گیشا نمه‌ مه‌رزیۆره‌.

 

ژه‌نی یانه‌و شوویشه‌نه‌ وه‌شش بۆ ته‌وه‌نی به‌ کۆڵ کێشۆ

سه‌بووری ژه‌نێ نیشانه‌ مذۆ

 

ژه‌نێوه‌ ماره‌ نه‌کریه‌ی بێ داواو هه‌شتیه‌کی که‌رێ

قسێوه‌ی ناحه‌قه‌ و ئێدێعه‌یوه‌ بێ مه‌ورێده‌

 

تۆ هاکه‌ری من هوو که‌روو  تۆ ژه‌نی باری من شوو که‌روو

ئینه‌ وه‌ختێوا که‌ ژه‌ن و پیا پێوه‌ره‌ گژیا و پیاکه‌ ماچوۆ من ژه‌نی ماروو  و تۆ ته‌ڵاق مذه‌و.

 

وه‌شا ئه‌یر و وه‌شا دوو  وه‌شابرا نه‌ وه‌ک شوو

هیچکه‌س پێسه‌و شووی په‌ی ژه‌نێ نزیک و مه‌حره‌م نیا حه‌تتا برا.

 

جوان بنیشۆ به‌لای جوانه‌وه‌    ماچی شه‌مامه‌ن به‌ بۆیسانه‌وه‌

جوان بنیشۆ به‌ لای پیــره‌وه‌      پێســه‌ن زیننانی به‌ زه‌نجیره‌وه‌

(کبوتر با کبوتر وباز با باز)

 

حه‌وت نانی نانه‌وایی حه‌وت سه‌لک و پاچه‌ گایی

حه‌وتش وارذێ به‌ نازه‌و حه‌وتش وارذێ به‌ پیازه‌و

حه‌وتش وارذێ به‌ شۆتی مانگا بازه‌و

ئه‌ذاش مرۆ وه‌ڵگه‌شا  هیچش نه‌وارذ به‌رذه‌شا

زه‌مانێو که‌ کناچێوه‌ فره‌وه‌ره‌ و له‌موه‌ شوو که‌رۆ


ڕۆجیار 15-1-1392





نوع مطلب :
برچسب ها :
لینک های مرتبط :
دوشنبه 12 فروردین 1392 :: نویسنده : نسیم هه‌ورامان

ئێشه‌و  یۆ جه‌ ده‌فته‌ره‌کام ( دفترخاطرات) وه‌ره‌ق دێنێوه‌ ئی شێعرێمه‌ دلێشه‌نه‌ دیه‌ فره‌ وه‌شم ئاما . واتم ئینه‌ حه‌کایه‌توو نویسه‌ره‌ دڵسۆزه‌کاو ئارۆو هه‌ورامانیا جه‌ وه‌راوه‌روو ناسیۆناڵیزمی بۆگه‌نی فاشیستی که‌ به‌ دیه‌و نه‌سری هه‌ورامی  چه‌مێشا خه‌ریکێنی به‌رمه‌یا  ئی شێعرێ هۆرئه‌وه‌گێڵنای شێعرێوێ فارسیه‌نه‌ که‌ پاسه‌ بزانوو به‌ کۆرذیچ هۆره‌شا گێڵنه‌ینه‌وه‌. ته‌ماشه‌و تارێخوو نویسه‌و شێعره‌کێم جه‌ ده‌فته‌ره‌که‌نه‌ که‌رذ نویسیابێ 12/11/1365 یانێو ویس و حه‌وت ساڵێ چه‌یوه‌ڵته‌ر .کۆچلێو په‌ی وێم مه‌نانێره‌ ئاخر  ویس و حه‌وت ساڵێ چه‌یوه‌ڵته‌ر من تاوانم ئی چێوا بنویسوو  داخه‌م مه‌شۆ په‌ی عه‌مری ویه‌رذه‌ی هیچ نه‌که‌رذه‌ی .

 

بـه‌ بـۆنـه‌و ئینـــه‌ی گــۆڵــم چنیــه‌بێ

ده‌سم بۆی وه‌شه‌و گۆڵیش گێرته‌بێ

***

که‌له‌مچه‌شا ئارذ که‌رذشا ئه‌و ده‌سم

نه‌کـــه‌رۆ بـۆی گۆڵ ئێتـر نـه‌فـه‌ســـم

***

به‌ڵام کــه‌س ویروو ئانه‌یش نه‌کـه‌رذه‌ن

ده‌سێو گۆڵش نیا بۆ حه‌تمه‌ن بۆش گێرته‌ن


ڕۆجیار 12-1-1392




نوع مطلب :
برچسب ها :
لینک های مرتبط :

یکی را از بزرگان بادی مخالف در شکم پیچیدن گرفت و طاقت ضبط آن نداشت و بی اختیار از او صادر شد گفت ای دوستان مرا در آنچه کردم اختیاری نبود و بزهی بر من ننوشتند و راحتی به وجود من رسید شما هم به کرم معذور دارید.

شکم زندان بادست ای خردمند   ***     نــدارد هیــچ عـــاقل باد در بنـــد

چــو باد اندر شکـم پیچد فرو هل   ***    کـه باد اندر شکــم بارست بر دل

حــــریف ترشـــروی نــاســـــازگار    *** چوخواهد شدن دست پیشش مدار

گلستان باب دوم در اخلاق درویشان

**************************

یۆ جه‌ گه‌وره‌کا جه‌ مه‌جلێسێوه‌نه‌ ڤایێوه‌ پیچیانه‌ له‌مه‌ش هه‌ر چێوش که‌رذ نه‌تاواش وێش  گێرۆ وه‌رش دا و واتش ئه‌ی دۆسان ئی کاره‌ که‌ که‌رذم ده‌سوو وێم نه‌بێ خۆ من گۆناعه‌م تووش ناما  و ڕه‌حه‌تیچم پنه‌ یاوا شمه‌یچ به‌ که‌ره‌موو وێتا من به‌خشدی .

له‌مه‌ زیننانا په‌ی ڤای ئه‌ی عاقڵ

حه‌بس که‌رذه‌و هه‌وای کارێوا باتڵ

هه‌روه‌ختێو ئی ڤا ئامائه‌و ده‌روون

ئه‌ر وه‌رش نه‌ذه‌ی مه‌بینه‌ زه‌بوون

ڕه‌قیبی به‌ذ ئه‌خم ئه‌ر لوا به‌ په‌له‌

ده‌سش مه‌گێره‌ و مه‌واچه‌ مه‌له‌

ئه‌ڵبه‌ت مه‌به‌سوو من ئه‌چی نویسه‌یه‌  ڤاو له‌مێ نه‌ بێ به‌ڵکم چن ڕوێ چه‌ی وه‌ڵته‌ر حه‌کایه‌تێوم سه‌ر ئاما که‌ به‌ قه‌وڵوو فارسا بی به‌ سووژه‌ .

ڕاسه‌کێش ڕوێو جه‌ یاگێوه‌نه‌ کابره‌ێو مه‌نه‌بێره‌ په‌ی کارێوی منیچ کتووپڕ  ڕاو چاره‌و کاره‌که‌یم پنه‌ نیشان دا و واتم مشیۆ کو‌گه‌ بلی و چێش که‌ری. سه‌وایش ئاما په‌ی لایم  و کاره‌که‌ش جه‌ من گه‌ره‌ک بێ منیچ به‌ خاتره‌و ئینه‌یه‌ که‌مته‌ر به‌ی و که‌مته‌ر وینووش قه‌وڵوو یارمه‌تیم دا  پنه‌ وه‌لێم هه‌چی ویر که‌رێنه‌ی جه‌ تواناو منه‌نه‌ نه‌بێ ئی کابرایچه‌ واز نارێ چن که‌ڕه‌تێ وێش و که‌سانێو ته‌ر هه‌ر ئه‌ینێ یانه‌ و ئیسراحه‌توو من و زارۆڵه‌کاشا بڕیه‌بێ. هه‌رچی قه‌وم و که‌س وکاریچما وسه‌بێش زه‌حمه‌ت منیچ نه‌تاوێنێ هیچش په‌ی که‌روو ئاذیچ ئاخرش زاناش جه‌ ده‌سوو منه‌نه‌ کارێو به‌ر نمه‌ی دوی قسێش پنه‌ واتانێ و لوا منیچ ئی شێعره‌و شێخی سه‌عدیمه‌ ئاماوه‌ هۆش و داخیێنه‌ هۆرم گێڵناوه‌ به‌ هه‌ورامی.


                                                                                                          ئێبراهیم شه‌مس 14-10-1390





نوع مطلب :
برچسب ها :
لینک های مرتبط :
یکشنبه 4 فروردین 1392 :: نویسنده : نسیم هه‌ورامان

 به‌ێنێو گرذه‌ ڕوێ لوێنێ په‌ی یاگێوی (گه‌ره‌کم نیا نامێو یاگه‌کێ ده‌و) هه‌رچی لوێنێ دلێ ڕاکێنه‌ یاوێنێ پیه‌یوی ته‌مه‌ن درێژ به‌نه‌زه‌ره‌م 55 ساڵه‌ که‌ جه‌ ده‌گاکێ وێشه‌نه‌ پای پیاذه‌ لوێ په‌ی ئا یاگێ. دڵه‌نه‌ واچێنێ داخۆم کۆگه‌ ملۆ و چێش که‌رۆ  تا ئینه‌ که‌ ڕوێو که‌وتانێ شۆنیش دیم لوا دلێ قاوه‌خانێوی و چنی چن نه‌فه‌را ته‌ری ده‌سش که‌رذ به‌ دۆمینه‌ که‌رذه‌ی من وێم گێرته‌ره‌ چوون گرذی ئژناسێنێ و ئاذێچێ چنی من ڕووده‌روه‌یسیشا بێ بڕێوشا جوانێ و بڕێویچشا پیرێ بێنێ به‌ڵام هیچ ته‌قیه‌و حیا به‌ینشانه‌ نه‌بێ جه‌ به‌ینوو دۆمینه‌که‌رذه‌که‌یشانه‌ قه‌سه‌م وه‌رێنێ ته‌ڵاقێ وزێنێ و دژمانی به‌ یۆترینی دێنێ .

من ڕاسه‌کێش سه‌ره‌م سڕ مه‌ن جه‌ کاروو ئاذیشا ئی کسمه‌ چێشا گێرته‌نشانه‌ وه‌ر ئاکابرا پا سنعشه‌وه‌ چی مشیۆ 10کیلوومێتری ڕا پیاذه‌ پیمۆ بلۆ په‌ی کارێوی بێ که‌ڵک و بێ هووذه‌ی .

به‌ نه‌زه‌ره‌و من ئی کاروو ئاذیشا عاذه‌تێوی خرابا "ئێعتیاد" و ناهه‌نجاریێوا که‌ ته‌مه‌ڵی و بێ مه‌سئوولیه‌تی مارۆ.

 دۆمینـه‌ کـه‌رذه‌ی ئه‌ر بــه‌ ده‌وامـه‌ن

چوونکه‌ وه‌خت گێرۆ به‌حه‌ق حه‌رامه‌ن

چـوون ئی هـه‌رمانێ مه‌رۆ ته‌غافڵ

 نمـه‌لۆ ده‌ورشه‌نه‌ ئێنسانی عاقڵ

بـــه‌ جیاتــی ئانه‌‌ی دۆمینـه‌ کـه‌ری

وه‌ختوو  وێت پانه‌ی هه‌ذه‌ر مذه‌ری

بۆ به‌ قسێـو ئه‌من گۆشت بسپـاره‌

چێوێـوتـه‌ر که‌ره‌ به‌ جیای ئی کاره‌

لـوه‌ کار کـــه‌ره‌ ڕووزیت فره‌ته‌ر بۆ

یا په‌ی سه‌یرانی لوه‌ که‌ش و کۆ

یا خــۆ چن ڕه‌کات نمـای نه‌وافـڵ

یا زکری خـوا په‌ی ته‌سکینـی دڵ

ئــی کاره‌ جیاتــی دۆمینــه‌ بازی

هه‌م په‌ی وێت خاسه‌ن هه‌م خوا ڕازی


ئیبراهیم شه‌مس 26-11-1391



نوع مطلب :
برچسب ها :
لینک های مرتبط :
شنبه 3 فروردین 1392 :: نویسنده : نسیم هه‌ورامان

ئه‌گه‌ر ڕوێو ئاماو هه‌ڕه‌شێشا ونه‌ که‌رذی ، ئانه‌ بزانه‌ ده‌ره‌قه‌تت نمه‌یا

* * * * * * * * * * * * * *

ئه‌گه‌ر ڕوێو ئاماو خیانه‌تشا ۆنه‌ که‌رذی، ئانه‌ بزانه‌ قیمه‌تت ئینا سه‌ره‌وه‌

* * * * * * * * * * * * * *

ئه‌گه‌ر ڕوێو ئاماو ئاسیشا جیا ، ئانه‌ بزانه‌ چنی تۆ بیه‌ی لیاقه‌تش گه‌ره‌کا


ڕۆجیار 3-1-1392




نوع مطلب :
برچسب ها :
لینک های مرتبط :
جمعه 2 فروردین 1392 :: نویسنده : نسیم هه‌ورامان

ویروو تۆ ساوه‌ سوورێ به‌رزته‌رین له‌قوو دره‌ختێوی به‌رزیا په‌ی زارۆڵێوی

کۆتا باڵای مانیایوی بێ هه‌ناسه‌ی چێش که‌رۆ جگه‌ جه‌ تاسه‌ی !


ڕۆجیار 2-1-1392





نوع مطلب :
برچسب ها :
لینک های مرتبط :
پنجشنبه 1 فروردین 1392 :: نویسنده : نسیم هه‌ورامان
به‌ نامێو خوای گه‌وره‌ی

عێشق گه‌وره‌ته‌رین چێوێوا که‌ جه‌ دنیاو عێرفانیه‌نه‌ نامێش بریۆ. عێشق یا مه‌حه‌به‌ت  و وه‌شه‌ویسی یۆ جه‌ ده‌ مه‌قاموو ته‌سه‌وفیا که‌ جه‌ شێعره‌و شاعێره‌کانه‌ و کتیبه‌ عێرفانیه‌کانه‌ فره‌ گنۆ وه‌روو چه‌میه‌وه‌. عێشق مه‌رته‌بێ فرێش هه‌نێ که‌ چێگه‌نه‌ مه‌جاڵوو قسه‌که‌رذه‌ی سه‌روو مه‌رته‌به‌کا نیا به‌ڵام ئا چێوه‌ که‌ ئێمه‌ فره‌ جه‌ باره‌و عێشقیه‌وه‌ مژنه‌ومێش عێشقی مه‌جازی و عێشقی حه‌قیقیا .هه‌ر ئێنسانێو که‌ جه‌ سه‌ره‌شه‌نه‌ مه‌ژگ و جه‌ سینه‌شه‌نه‌ زێڵێوه‌ بیه‌ حه‌تمت بۆ ڕوێو گیر وارده‌و عێشقی بیه‌ن. وه‌ ئا که‌سیچه‌ جه‌ ژیوایشه‌نه‌ هیچ وه‌ختێو ئێمتێحانوو عێشقیش نه‌که‌رذه‌ن شکه‌ت نه‌بۆ چنه‌ ئا که‌سه‌ بۆوێو جه‌ ئێسان بێه‌یش نه‌به‌رذه‌ن‌.

هه‌ر که‌س ده‌وونش جه‌ عێشق خالییه‌ن

کانگـــاو دێویــه‌ن ئانه‌ ، دڵ نیــه‌ن

 

قه‌لی بێ خه‌به‌ر تۆ مه‌رده‌یت خاسه‌ن

چوون بۆڵبۆڵ جه‌ گۆڵ ناخـافڵ نیه‌ن

 

سڵ که‌رذه‌ن بێ دڵ جه‌ ئاسانه‌ی عێشق ‌

جه‌ ڕای دۆسی وێش هیچ مه‌نزڵ نیه‌ن

 

ده‌روونی بێ عێشق چه‌می بێ نووره‌ن

جه‌ چه‌می بێ نوور ، نوور حاسڵ نیه‌ن

 

هه‌ر که‌س مه‌جنوون بۆ ئه‌چی مامه‌ڵه‌

(شه‌مس ) نه‌واچی ئاذ عاقڵ نیه‌ن

 

عاشق دلێ ڕاویارذه‌و عێشقیه‌نه‌  به‌ یاگێوه‌ میاڤۆ گرذوو ئاچێویه‌ جه‌ گیان و دڵشه‌نه‌ وه‌شه‌ویسی ئێنسانی چنی ئێنسانیا ، ڤاڕیو به‌ وه‌شه‌ویسی و عێشق به‌ خوای وه‌شکه‌روو عاڵه‌می .

جه‌ کتیبوو « فیه ما فیه» مه‌ولانایه‌نه‌ حه‌که‌یتێوه‌ ئامه‌ینه‌:  

به‌ مه‌جنوونی واتشا زه‌ریفته‌ر جه‌ له‌یلێ هه‌نێ با‌ بارمێ په‌یت واتش شمه‌ حاڵیتا نیا خۆ من  له‌یلێم ئه‌پی (ڕوه‌)سووره‌ته‌ گه‌ره‌که‌نیه‌نه‌ لیه‌لێ ڕوه‌ نیه‌نه‌ له‌یلێ به‌ ده‌سوو منه‌وه‌ پێسه‌نه‌ جامڵێوی ‌من ئه‌چا جامڵه‌نه‌ شه‌راب مه‌روو  په‌س من عاشقوو ئا شه‌رابیه‌نا که‌ چنه‌ش موه‌روو به‌ڵام شمه‌ هۆشتا ئینا لاو جامڵه‌که‌یه‌وه‌ وه‌ جه‌ تاموو شه‌رابه‌که‌ی بێ خه‌به‌رێندێ . ئه‌گه‌ر من جامڵێوی تڵاینم بۆ به‌ڵام دلێش په‌ڕ کریابۆ‌ سرکه ده‌ر‌ذه‌و من مه‌وه‌رۆ ‌ ئاشه‌رابه‌ فه‌قه‌ت به‌ ئه‌شته‌هاوه‌ پیویۆ ئیسه‌ تۆ شه‌وق و ئه‌شته‌ها به‌ده‌س باره‌ ڕواڵه‌ت وین نه‌بی و هه‌ر یاگێۆ بذیه‌ی هه‌ر کۆگه‌ ته‌ماشا که‌ری مه‌عشووقی وینی . ڕوه‌و ئی خه‌ڵکیچه‌ پێسه‌نه‌ ئی جامڵا و عێلم  و زانایی نه‌قش و نگاروو جامڵاکه‌یه‌نێ  وه‌ختێو که‌ ئا جامڵه‌ مه‌ڕیۆ نه‌قشه‌کێ مه‌مه‌ نا په‌س ئه‌سڵ ئاشه‌رابه‌نه‌ که‌ ئینا جه‌ قاڵبوو جامه‌که‌یه‌نه‌ وه‌ هه‌رکه‌س ئا شه‌رابیه‌ موه‌رۆ وینۆ که‌ « الباقیات الصالحات »


ئیبراهیم شه‌مس 13-10-1390



نوع مطلب :
برچسب ها :
لینک های مرتبط :


آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :
 
 
 
شبکه اجتماعی فارسی کلوب | Buy Website Traffic