تبلیغات
ڕۆجیاروو هه‌ورامانی - ژیونامه‌ ( 7) / ئیبراهیم شه‌مس
 
ڕۆجیاروو هه‌ورامانی
بنویسمێ به‌زوانی هه‌ورامی،بوانمێوه‌به‌زوانی هه‌ورامی که‌ئاڵاو قه‌ڵه‌می نه‌بڕیه‌ینه‌ باڵاوهیچ مێلله‌تێویه‌ره. محه‌مه‌دمسته‌فازاده
درباره وبلاگ


ڕۆجیاروو هه‌ورامانی په‌لیانێوه‌ی شه‌خسیه‌نه‌ که‌ دلێشه‌نه‌ ژیونامه‌و وێم ، هۆنیێ ، داستانێ گۆلالێ ، قسێ قه‌ذیمیا و هه‌رچێو ئاما سه‌روو ویر و ئاوه‌زیم منویسوو ئیشه‌ڵڵا وانه‌رێ ئازیزێ که‌ڵکش چنه‌ هۆرگێرا.

(ئیبراهیم شه‌مس)

ڕۆجیار = شمس



مدیر وبلاگ : نسیم هه‌ورامان
یکشنبه 12 مرداد 1393 :: نویسنده : نسیم هه‌ورامان

ئاژه‌و پاوه‌ی جه‌‌ ساڵه‌و 1357ی:

ساڵه‌و 1357ی پاوه‌ چاره‌کێوو (یه‌کچوارۆم ) ئیسه‌یچه‌ نه‌بێ . متاوو واچوو پاوه‌ سه‌ر جه‌م شش هه‌زارێ نفووسه‌ش بێ پاوه‌ جه‌ سه‌راو هه‌وڵی تا لاو حه‌ماموو شه‌هرداری و جه‌ که‌ڵیان تا مه‌یذان ئینه‌ گرذوو پاوه‌ی بێ .

وه‌ختێو جه‌ کرماشانه‌و  به‌ره‌و پاوه‌ ئه‌ینی ئه‌وه‌ڵ یاوینی دووریسان، دماوه‌ سه‌رباوه‌ر که‌ ئیسه‌ ترمیناڵ و به‌شێوی فره‌و پاوه‌ی که‌وته‌ن ئاگه، بلوار که‌شێوی ڕووت بێ . دماته‌ر یاوینی بیمارستان (ناوه‌شخانه‌)  به‌ینوو بیمارستانی تا کۆیمه‌کاڵ دویه‌ر یانێ بێنێ ئێتر یانه‌ نه‌بێ تا مه‌یذان .

جه‌ نه‌وسووذیچه‌و وه‌ختێو ئه‌ینی نووریاو ترازیه‌یانی تاکالیان بیابان بێ جه‌ که‌لیان قاوه‌خانێو بێ هینوو ده‌روێش سدێقی که‌ جارجار مسافرێ چنه‌ش ئیسراحه‌ت که‌رێنێ .


خیابانی ئه‌سڵی ئا خیابانه‌ بێ که‌ جه‌ مه‌یذانه‌و ده‌سپنه‌ که‌رێ تا یاوێ هه‌وڵی ئیجا به‌ینوو هه‌وڵی تا بیمارستان جاذێوی خاکی ته‌سک بێ واچێنێش پنه‌ چاذه‌و که‌مه‌ربه‌ندی . خیابان مه‌رکه‌زی ئیسه‌یه‌ یانێو جاذه‌ خاکی ئازه‌مانه‌یه‌ هه‌ڵای ته‌مام وه‌ش نه‌کریابێ یانێو وه‌روو مه‌مبه‌که‌و هه‌وڵیه‌نه‌ ده‌سش پنه‌کریابێ تا په‌شته‌ حه‌ماموو شه‌هرداری یاوابێ.پاوه‌ نۆ دانێ مه‌حه‌لێ مه‌شوورێش بێنێ : سه‌ردێ ، شه‌خه‌ڵیان ، پشه‌ ، زواره‌ ،  قه‌ڵاخوانی ، قره‌مشانی ،فه‌یزاوا ، میراوا ، ئاسنگه‌ران      

پاوه‌ چن دانێ یانێ گه‌ورێ ده‌ڵه‌تیێش چنه‌ بێنێ پێسه‌و فه‌رمانداری ، ساواک ، چوارده‌زگا (یانێ سازمانیێ) ، یانه‌وجوانا (وه‌حده‌ت) ، شاره‌بانی ، ژاندارمری ،...

پاوه‌ نۆ مزگیێش بێنێ : ئیمام شافێعی ، زمسان ، جمعه‌ ، به‌لال ، خزری زیننه‌ ، میرعه‌مه‌ر ، دۆخان ، حاجی عۆسمان و حه‌زره‌توو عه‌بدۆڵڵای . دماته‌ر دۆێ مزگیێ زیاذێ بیێ بێنێ : ته‌کیه‌ و سابێقی چا وه‌خته‌نه‌ پاوه‌ 11 مزگیێش بێنێ . یانزه‌ مزگیێ په‌ی شارێوی گولاله‌ی پێسه‌و پاوه‌ی نیشانێ دینداری خه‌ڵکی و هه‌میه‌توو ئی مه‌سه‌لێ بی .

یاگێ مه‌شوو پاوه‌ی چا سه‌رده‌مه‌نه‌ :

ویمیر : ویمیر  سه‌یرانگای مه‌شووروو پاوه‌ی که‌ ئینا سه‌راوننو سه‌راو هه‌وڵیه‌و و پاڵش دان شاهۆیه‌و . چا سه‌رده‌مه‌نه‌ فره‌و خه‌ڵکوو شاروو پاوه‌ی حه‌یوانێشا بێنێ جه‌ مه‌یێ و بزێ و گاوێ. گه‌له‌و پاوه‌ی جه‌ ویمیره‌نه‌ له‌وه‌ریێ و بڕێو هه‌ورارێچ بێنێ که‌ هه‌واریێ جه‌ ئه‌وه‌ڵوو وه‌هاری تا پایێز لوێنێ په‌ی ئاگه‌یه‌. پاسه‌ بزانوو ویمیر چن دانێ هانه‌چه‌مێ په‌ڕ ئاوێش بێنێ به‌ڵام ئیسه‌ چا هانه‌چه‌ما خه‌به‌رێو نیا. گوایا دماو ئانه‌یه‌ چاڵه‌ی قووڵه‌شا په‌ی ئاوه‌و پاوه‌ی که‌ننه‌ ئا هانه‌چه‌مێ و هه‌ر پاسه‌ سه‌راو هه‌وڵی وشکشا که‌رذ. به‌ داخه‌وه‌ زه‌ریفی ویمیری پێسه‌و ئاوه‌خته‌یه‌ نه‌مه‌نه‌ن و چن نه‌فه‌رێچ چاگه‌ یانه‌ و مڵکشا وه‌ش که‌رذه‌ن و ویمیرشا که‌رذه‌ن مڵکی شه‌خسی وێشا ئه‌ڵبه‌ته‌ ئینه‌ ڕه‌بتێوش به‌ من نیا به‌ڵام ئا وه‌شیه‌ و ئا هه‌وا پاک و دیمه‌نه‌ جوانه‌ حه‌یفا گرذوو پاوه‌ی چنه‌ش ئێستفاده‌ نه‌که‌را.

 سه‌راو هه‌وڵی : سه‌راو هه‌وڵی سه‌راوێوی گه‌وره‌ بێ ئێننه‌و ئیسه‌و سه‌راوه‌که‌و ڕوانسه‌ری حتتا فره‌ته‌ر ئاویش بێ پاڵشه‌نه‌ چن دانێ وه‌ڵگه‌ڕنێ گه‌ورێ بێنێ و قاوه‌خانێو  که‌ خه‌ڵکوو پاوه‌ی جه‌ جوان و پێر هه‌ر وه‌خت جه‌ کاری شه‌که‌تێ بێنێ چن سه‌عاتێو چیروو ئا وه‌ڵگه‌ڕنانه‌ و پاڵوو ئا ئاوه‌ زرێفێ نیشێنێره‌ و چایێو وه‌رێنێ و جه‌ باره‌و گرذ چێوی قسێ که‌رێنێ . قاوه‌خانه‌و سه‌راو هه‌وڵی پێسه‌و ئی قاوه‌خانا نه‌بێ که‌ فه‌قت جوانێ جه‌ به‌تاڵیه‌نه‌ بلا ده‌س که‌را قلیان كێشته‌ی و بڕێو کارێ بێ هووذێ ته‌رێ . 

مه‌رقه‌ذوو سه‌یێد مه‌حموود ئێسفه‌هانی : ئی شه‌خسه‌ جه‌ زه‌مانوو سنی قڕانیه‌نه‌ (سه‌رده‌موو سه‌فه‌ویه‌کانه‌) به‌ر شیه‌ن و به‌ عه‌زموو په‌نا به‌رذه‌ی به‌ حکوومه‌توو عۆسمانی جه‌ ڕاو پاوه‌یه‌نه‌ گه‌ره‌کش بیه‌ن بلۆ په‌ی ئه‌سه‌مووڵی به‌ڵام جه‌ پاوه‌نه‌ مه‌نه‌نه‌ و ناوه‌ش که‌وته‌ن و وه‌روو مه‌حه‌لێ سه‌ردێنه‌ ئه‌سپه‌رذه‌ کریان. ئیسه‌ قه‌بره‌کێش بیێنه‌ زیاره‌تگا.

ده‌ره‌باسام : بازاروو ئه‌سڵی پاوه‌ی جه‌ ده‌ره‌باسامه‌نه‌ بێ تا ئا یاگێ من مزانوو و جه‌ که‌سی نه‌په‌رسانم ، ده‌ره‌باسام هه‌م عه‌ماره‌تی حکوومه‌تیش چنه‌ بێ و هه‌م بازارێو که‌ فره‌و سنفه‌کاش دلێنه‌ بێ . جه‌ ئاسنگه‌ری گێره‌ تا دووکانوو پاڵایا و کووتاڵ و ده‌لاکی و قه‌سابی و که‌بابی و به‌سته‌نی وره‌شی و.. مزگی حه‌زره‌توو عه‌بڵڵای که‌ گێڵۆوه‌ په‌ی سه‌رده‌موو ئێسلامێ جه‌ ده‌ره‌باسامه‌نه‌ بێ.

مه‌رقه‌ذوو شێخ نه‌سره‌دینی و ته‌کیه‌ : مه‌رقه‌ذوو ئه‌ولا چا وه‌خته‌نه‌ ئێتر یانێ نه‌بێنێ و ئیسه‌ خه‌ڵکی خه‌ریک بێ یانێ که‌رینێوه‌ پاسه‌ بزانوو قه‌برسانوو قه‌ذیموو پاوه‌ی لاو مه‌رقه‌ذی بێ. ته‌کیه‌و شێخ نه‌سره‌دینی چا وه‌خته‌نه‌ جه‌ ئیسه‌یه‌ فره‌ته‌ر گه‌رم بێ گرذه‌ شه‌وه‌و جمعه‌ی ڕاوراداری نه‌بێ و په‌ر بێوه‌ جه‌ ده‌روێشا که‌ تا دویه‌رێ سه‌عاتێ زکر که‌رێنێ

که‌ڵیان : یا که‌لوو هه‌ره‌تڕنه‌ی فه‌قه‌ت عه‌ماره‌توو فه‌رمانداریش چنه‌ بێ و چوار ده‌زگایچ چوار یانێ سازمانیێ بێنێ و ئه‌ولاته‌ر یانه‌و ئۆسا حه‌مه‌عه‌لی ده‌ره‌هه‌جیجی بێ و به‌ره‌و مه‌یذانیچ قاوه‌خانه‌و ده‌روێش سدێقی و وارته‌ر ئێداره‌و ساواکی بێ و به‌ره‌و نه‌وسووذه‌یچ مڵکوو شه‌هرداری و ئێتر یه‌ک یانه‌یچ نه‌کریابێوه‌.

مه‌یذان : مه‌رکه‌زوو پاوه‌ی بێ چا وه‌خته‌نه‌ په‌ڕ بیه‌بێوه‌ جه‌ دووکانا و قاوه‌خانا و مسافرخانا و چڵه‌وکه‌بابیا و که‌بابیا و ئێداراتێ ده‌وڵه‌تی. مه‌یذان نامێش هه‌ر مه‌یذان بێ یانێو نامێش په‌ی وه‌شه‌ نه‌کریای بێ. گاراج جه‌ مه‌یدانه‌نه‌ بێ چوار په‌نج ماشێنێ دوه‌کابێنێ و په‌یکانێ و دوێ مینیبووسێ ئینه‌ گرذوو ماشینا ئا گاراجه‌یه‌ بێ وه‌شڵه‌ی پا وه‌ختیه‌ که‌ ڕه‌حه‌ت دلێ شاریه‌نه‌ تاوینی بلی ڕانه‌. قاوه‌خانه‌و لالۆ بارامی پاڵوو گاراجیه‌نه‌ بێ . و هه‌ر پاسه‌ که‌بابی لالۆ فه‌یزه‌ی و چڵه‌وکه‌بابی و مسافرخانه‌و لالۆ حه‌مه‌سه‌لیمی و که‌بابی حه‌مه‌ذه‌ی و مه‌حمووذه‌ی و قاوه‌خانه‌و هانه‌و تفێ و مسافه‌خانه‌و تاهێرزاذه‌ی و عه‌کاسی زیای و عه‌کاسی وه‌لی که‌ واچێنێ یه‌هووذی بێ . عه‌ماره‌توو شه‌هرداریچ هه‌ر جه‌ مه‌یذانه‌نه‌ بێ .

ده‌ره‌و ئاساوا : ئی ده‌ره‌ سه‌رچه‌مه‌ش ویمیر و سه‌راو هه‌وڵی بێ  هه‌ر پاسه‌ که‌ جه‌ نامێشه‌نه‌ دیارا چن دانێ ئاساوێش بێنێ که‌ ئیسه‌یچ یۆشا مه‌نه‌ن و هه‌ڵای کار که‌رۆ . ده‌ره‌و ئاساوا ئێننه‌ ئاویش بێ ڕه‌حه‌ت زارۆڵێوی به‌رێ . ئی ئاوێ جه‌ مه‌یذانه‌نه‌ به‌ هاڕه‌ پڕێره‌ ده‌ره‌و لوێ دلێ مڵکاو پاوه‌ی و خانه‌گای.

کۆیمه‌کاڵ: کۆیمه‌کاڵ پارکێوی تازه‌ وه‌ش کریا بێ جه‌ زه‌ریفته‌رین یاگێ پاوه‌یه‌نه‌ .ئه‌گه‌ر جه‌ دووره‌و ته‌ماشه‌و کۆیمه‌کاڵی که‌ری وینی هیچ یاگێو ته‌ر ئاننه‌ وه‌چه‌مش زه‌ریف نیا جه‌ کۆیمه‌کاڵه‌نه‌ یانێو وه‌ش کریا بێ که‌ ئیسه‌ تالاره‌نه‌ و زه‌ماوننێ چاگه‌نه‌ گیریا پاسه‌ بزانوو ئاوه‌خته‌ تریا بێ و مه‌شرووباته‌ ئه‌لکۆلی وره‌شیێ .

ئینێ یاگێ وه‌شی پاوه‌ی بێنێ .

ئه‌گه‌ر جه‌ باره‌و ئاژه‌و کۆمه‌ڵگایی ئا سه‌رده‌مه‌و پاوه‌یه‌ باسیچ که‌روو ، متاوو واچوو پاوه‌ ڕوه‌ش نیایبێ پیشره‌فتی و جه‌ له‌حازوو رۆشونیریه‌وه‌ جه‌ گروو مه‌حاڵه‌کاته‌روو پارێزگاو کرماشانی و حه‌تتا کرماشانیچ که‌وته‌بێ وه‌ڵێ . پاوه‌ هه‌ر جه‌ قه‌ذیمه‌و دارۆلعێلم بیه‌ن و هه‌ر جه‌ ئه‌وه‌ڵوو ساڵه‌کاو حکوومه‌توو پاله‌وی مه‌دره‌سێش ئامه‌ینێنه‌ و حه‌تتا جه‌ وه‌ختوو شۆڕشی ئێسلامی دانشسه‌راش بێ . گرذوو مه‌نته‌قه‌و جوانرؤ و ڕوانسه‌ر و سه‌لاس و باوه‌جانی مه‌عه‌لێمه‌کێشا  پاوه‌یێ بێنێ . هه‌ر پاسه‌ جه‌ ویاروو دینیچه‌نه‌ پاوه‌ چنها عالمێ دینیێش بێنێ پێسه‌و حاجی مامۆسای ، مه‌ڵڵا قاذری ، شێخ ته‌های ، مه‌ڵڵا ناسری ، قازی ئه‌نساری ، مه‌ڵڵا عه‌مه‌ری ، مه‌ڵڵا سه‌عڵڵای هه‌جیجی ، ... وه‌ هه‌ر پاسه‌ واتم یانزه‌ مزگیێش بێنێ که‌ جه‌ماعه‌توو ساعبیشا چن سه‌فێ په‌ڕێ که‌رێوه‌. خه‌ڵکوو شاروو پاوه‌ی هه‌ر چن جه‌ ویاروو عێلمیه‌و ته‌ره‌قیش که‌رذه‌بێ به‌ڵام بێ دینی پێسه‌و ئیسه‌یه‌ نه‌تاوابێش بلۆ دلێش و من زه‌مانوو شای نه‌ذیم دلێ شاروو پاوه‌یه‌نه‌ ژه‌نێوه‌ سه‌ره‌ی ڕووت گێڵۆ.

پاوه‌ هه‌ر جه‌ ئه‌وه‌ڵوو پایێزوو ساڵه‌و په‌نجاوحه‌وتی ‌ئێنقلابش (شۆڕش) ئژناسا و ڕوێو نه‌بێ ته‌زاهۆرات جه‌ پاوه‌نه‌ نه‌کریۆ . ئه‌ڵبه‌ت لازم به‌ واته‌یا چن ساڵێ وه‌ڵێ شۆڕشی خه‌ڵکوو ئی مه‌نته‌قه‌یه‌ زددوو ڕژیمی هۆرسێبێنێوه‌ و حه‌تتا  خه‌ڵکێوی فره‌ گیریایبێنێ و چن نه‌فه‌رێویچ ئێعدام کریای بێنێ .

مانگۆ گه‌ڵاخه‌زانی بێ گرذ ڕوێ ته‌زاهۆرات کریێ . خه‌ڵکوو پاوه‌ی که‌س نه‌یارێ شاره‌نه‌ بزیۆوه‌. خه‌به‌رئاما که‌ قه‌رارا ساڵار جاف به‌ی په‌ی پاوه‌ی و به‌ خاترۆ ئی ته‌زاهۆرات که‌رذه‌یه‌ پاوه‌ی به‌ سه‌زاو وێش بیاونۆ . حکوومه‌ت مه‌رکه‌زی جه‌ پاوه‌نه‌ نه‌مه‌نه‌بێ ساواکێو بێ و شاره‌بانیێۆ . ساواک هێزی چامنه‌شه‌ نه‌مه‌نه‌بێ و وێشا خاس زانێنێ ئاننه‌ عه‌مروو ڕژیموو شای نه‌مه‌نه‌ن شاره‌بانیچ فره‌ته‌رشا بوومی پاوه‌ی بێنێ . خه‌ڵکی مرووشیاوه‌ و په‌ی وه‌رگیری ، وێشا ئاماذه‌ که‌رذ. حاجی مامۆسا مه‌ڵڵا زاهێد به‌ڕه‌حمه‌ت بۆ واتش به‌خاتره‌و ئینه‌یه‌ جه‌نگ هۆر نه‌خێزیۆ و که‌س نه‌کوشیۆ ، و به‌ خاتره‌و ئێعتراز که‌رده‌ی پی هه‌رمانێ سالار جافیه‌ هه‌رچی پیا و جوانێنێ گرذ به‌یا جه‌ سه‌راوننوو هۆڵیه‌نه‌ بنیشاره‌ تا سالارجاف و دار و ده‌سه‌ش به‌یا و بلانێوه‌. من ئاوه‌خته‌ سێنزه‌ ساڵێم  و کاکه‌م حه‌فده‌ ساڵێش بێ . ویرما جه‌ ده‌ره‌باسامه‌نه‌ یاوانێ کاکه‌یم چنی دویه‌ر ڕه‌فێقاش یو تێڵایوی زلشا ده‌سه‌و بێ واتم من په‌ی هۆڵی ملوو تۆ نمه‌ێ؟ واتش من گه‌ره‌کما جه‌ شارێ پارێزگاری که‌روو . (کاکه‌م هه‌ر چا ڕواوه‌ پێسه‌و ئێنقلابیێوی تنن و تێژی وێش ئژناسنا ئاخۆر ته‌نیا که‌سێو بێ په‌ی یه‌که‌م که‌ڕه‌تی جه‌ پاه‌وه‌نه‌ عه‌کسوو شایش ماڕا و ساواکی گێرت.) من  چنی جه‌ماعه‌تی لوانێ . په‌شته‌و هۆڵیه‌نه‌ بێنمێ ماشینێ فرێ ئامای و جه‌ جاذه‌و که‌مه‌ر به‌ندی زیایوه‌ و جه‌ماعه‌تێوی فره‌ نزیکه‌و دوه‌سه‌ذ ماشینا و ڕه‌نگا ده‌وروو دوێ هه‌زار نه‌فه‌رێ هه‌ر یو ته‌ڵایو بڕێوشا بڕنه‌و و فلچه‌و تاپه‌ڕ و ساچمه‌ و بڕێویچشا خه‌نجه‌ڕێ و ته‌وه‌رداسێ وه‌لحاسڵ هه‌ر یۆ چێوێوش ده‌سه‌و بێ و گۆنیێویچ شانه‌شانه‌ به‌ خیاڵوو وێشا ئامای بێنێ تاڵان که‌را و بلاوه‌. نه‌ڕه‌و جایدشایشا لوێ ئاسمان. خه‌ڵکوو پاوه‌ی ته‌رسای بێنێ ئاخۆر که‌س بێجگه‌ ژه‌نا شاره‌نه‌ نه‌مه‌نه‌بێ . پیا گه‌وره‌کێ واتشا سه‌برتا بۆ به‌شکه‌م شۆعاری وێشا دا و بلاوه‌. به‌ڵام پاسه‌ نه‌بی هه‌یتاهه‌یتا ده‌نگوو گرۆڵیێ ئه‌ی .  

ئامه‌ی جه‌ پرده‌کێ هه‌وڵیه‌نه ‌پڕایوه‌ و وه‌راوه‌روو مه‌مبه‌که‌ی مدرای و روو به‌ خه‌ڵکه‌که‌ی تفه‌نگێشا ته‌قنای. هه‌ر چاگه‌ دوێ نه‌فه‌رێ زامدارێ بیێ یۆشا مه‌جیذی باتری ساز بێ و ئه‌ویۆکه‌شا نیازی مه‌نووچه‌ری. چا وه‌ختیچه‌نه‌ هه‌لیکۆپترێویچ ئاما خه‌ڵک تا ئیسه‌ هه‌لیکۆپترشا نه‌ذیه‌بێ پژگیای هه‌ریۆ یاگێوه‌ره‌ لوێ . یه‌ک نه‌فه‌ر به‌ نامێ عه‌لی خۆرشیدی کۆڵێو کۆلێشه‌و بێ و ئه‌وه‌سه‌ره‌وکووی لوێ چاگه‌ ته‌قه‌شا ونه‌ که‌رذو شه‌هیذ بی .

دوێ نه‌فه‌رێ ته‌رێ به‌ نامێ مه‌عرووف فه‌تاحی و ساڵح هۆشدار دلێ یانه‌و وێشانه‌ شه‌هیذێ بیێ . په‌شته‌و هه‌وڵیه‌و دوێ نه‌فه‌رێ لوایبێنێ دلێ که‌پره‌و سه‌ی فه‌تاحێ پاسه‌ بزانوو  سه‌ی فاتێح و ڕه‌سووڵی زوورئه‌سنا(دماته‌ر جه‌نگه‌نه‌ شه‌هیذ بێ) بێنێ .په‌لامارده‌ره‌کێ که‌پره‌کێشا ئایر دا به‌ڵام مه‌رذم مرووشیاوه‌ و لوای دوه‌نه‌فه‌ره‌که‌شا نه‌جات دای.

شێره‌ژه‌نی پاوه‌ی لێباسوو پیاییشا که‌رذه‌بێنه‌ و به‌غیره‌تێوی ته‌مام پاسه‌ کارێوشا ئارذ سه‌روو ئا نه‌ذامه‌ته‌ په‌لامارده‌راره‌ تا دنیادنیان جه‌ لاپه‌ڕه‌و تاریخیه‌نه‌ مه‌نۆوه‌ و باسش سه‌ر کریۆ. به‌ باوه‌ڕوو من پاوه‌ شارێوا هیچوه‌خت هیچ دژمه‌نێو نمه‌تاوو گێرۆش .ژه‌نی سه‌روو باناوه‌ به‌ ته‌وه‌نی و به‌ که‌پسوولێ و به‌ ئایر و به‌ هه‌ر چێو ئامان ده‌سشاوه‌ شانشا په‌ی په‌لامارده‌ره‌کا چنها ماشینێ سۆتێ. مینیبووسێو بێ تا نزیکه‌و مانگێوی لاشه‌ سۆته‌که‌ش جه‌ مه‌یذانوو پاوه‌یه‌نه‌ مه‌نه‌بێوه‌. پاسه‌ ماچا نزیکوو په‌نجا نه‌فه‌رێ چاذیشا کوشیای و چنها نه‌فه‌رێچ زامدارێ بیێ. به‌ڵام هیچوه‌خت ئامارێوی ڕێک ناما ده‌س.

جه‌ سه‌راسه‌روو ئێرانی سه‌روو ئی قه‌زیێ ناڕه‌زایه‌تی ئاما ڕوه‌ و جه‌ شاره‌کانه‌ په‌ی مه‌حکووم که‌رذه‌ی هه‌رمانه‌ تاوانباره‌کێ سالارجافی ته‌زاهۆرات کریا ئه‌گه‌ر ڕۆنامه‌کاو ئا سه‌رده‌مه‌یه‌ ته‌ماشه‌ که‌ردێ ویندێ ڕۆ سێنزه‌و ئابانی (گه‌ڵاخه‌زان) ڕوێوا که‌ به‌ شۆڕشی ئێسلامی ئێرانی کرژیش دا . جه‌ مه‌جلێسیچه‌نه‌ ئێعتێرازێ هۆرسێ و نمایه‌نده‌و ته‌بریزی (ئه‌حمه‌دبه‌نی ئه‌حمه‌د) جه‌ نمایه‌نده‌گی (استعفا)ده‌سش کێشت . ڕه‌ئیسوو مه‌جلێسیچ ده‌سوورش دا سالارجافشا جه‌ مه‌جلێسه‌نه‌ حه‌بس که‌رذ .وه‌ر نه‌دریا تا شۆڕش پیرۆز بی و سالار جاف جه‌ ئه‌وه‌ڵین که‌سا بێ که‌ کێشیا دار و به‌ سه‌زاو وێش یاوا.

ئێتر گرذه‌ ڕوێ جه‌ پاوه‌نه‌ خه‌ڵکی مجیێنه‌ خیابان و زددوو شای شۆعارێ دێنێ . ئیسه‌ جارجار عه‌کسێ ئازه‌مانه‌یه‌ ته‌ماشه‌ که‌روو گنوه‌ ویروو ئاڕوا و ئه‌جۆم ئارۆن . کاکه‌م چا ئێنقلابیه‌  فره‌ تننا بێ چن که‌ڕه‌تێ ساواکی گێرت تاته‌یچم فره‌ ته‌رسێ و دایمه‌ ده‌رگیرێ بێنێ که‌ واز بارۆ . چا سه‌رده‌مه‌نه‌ که‌زمسانیچ بێ ، نه‌وته‌ که‌مه‌ بیێبێوه‌ و خه‌ڵکی به‌ ته‌نه‌که‌ ساعبێو تا وێره‌گا دلێ سه‌فه‌و نه‌وتێنه‌ بێ کاکه‌م یۆ چاکه‌سا بێ که‌ شه‌و و ڕۆ خه‌ریکوو نه‌وت گێرته‌ی په‌ی خزه‌ڵکی بێ شه‌که‌تیچش په‌ی نه‌بێ.

وه‌لحاسڵ ئێنقلاب کریا ساواک و شاره‌بانی به‌ ده‌سوو مه‌ردمی گیریای کاکه‌م یۆ چا که‌سا بێ جه‌ شاره‌بانیه‌نه‌ تفه‌نگێوش ئارذ . هه‌ر چن گۆلاله‌ بێ به‌ڵام جزوو ئه‌وه‌ڵین که‌سا بێ جه‌ وه‌ش بیه‌و کۆمیته‌و ئێنقلابیه‌نه‌ جه‌ پاوه‌نه‌ به‌شداریش که‌رذ.

جه‌ پاوه‌نه‌ بێجگه‌ جه‌ کۆمیته‌و ئێنقلابی چن دانێ حێزبێچ چالاکیشا بێ پێسه‌و حێزبوو دمۆکراتی که‌ جه‌ پاڵوو کۆمیته‌یه‌نه‌ بێ .واروو سپای وه‌راوه‌روو پۆمب بنزینیه‌و ده‌فته‌رشا بێ. حێزبانێ ته‌رێ جه‌ پاوه‌نه‌ ده‌فته‌ر و چالاکیشا بێ پێسه‌ مۆجاهێدین خه‌ڵق و فه‌دایی و په‌یکار و کۆمه‌ڵه‌ به‌ڵام چالاکی دمۆکراتی فره‌ته‌ر جه‌ گرذی بێ . که‌ره‌ت که‌ره‌تێویچ جه‌لالیێ و قیاده‌ موه‌قه‌تێ ئێراقی وێشا نیشانه‌ دێنێ و به‌ ماشین ده‌وروو پاوه‌یه‌نه‌ په‌ی وێشا ڕژه‌ لوێنێ و ته‌رسه‌ وزێنێ دلێ دڵوو خه‌ڵکی. به‌ڵام جه‌ پاوه‌نه‌ خه‌ڵکی سه‌ر به‌ ده‌وڵتی تازه‌ بێ و فره‌و خه‌ڵکی تفه‌نگش بێ و هه‌یچوه‌خت ئیجازه‌شا نه‌ذا پاوه‌ گنۆ ده‌سوو یاگێوته‌ری .

. . . . .





نوع مطلب :
برچسب ها :
لینک های مرتبط :
سه شنبه 8 مهر 1393 02:46 ب.ظ
ان پک تولید و عرضه کننده مستقم محصولات تبلیغاتی (نمایشگاهی و فروشگاهی) ساک فروشگاهی (دسته پانچی , دسته بنددار) جهت مشاهده محصولات + دریافت لیست قیمت به سایت مراجعه نمایید | http://Npack.ir
یکشنبه 23 شهریور 1393 08:42 ق.ظ
سلام کاک ابراهیم
من اهل بوکان هستم به وبلاگ های هورامی سر می زنم نوشته بجای زاراوەی هورامی نوشته زیان هورامی من تعجب می کنم که آیا خودتان را جدا از کردها می دانید لهجەهای سورانی و کرمانجی هیچ وقت این کلمه را به کار نمی برند این در حالیست که جمعیت کرمانجی ها 75% کل کردهاست
نسیم هه‌ورامانکاکه‌ جه‌لالی ئازیز ئه‌گه‌ر هه‌ورامی زوان نیا بۆرێ چنیم هه‌ورامی قسێ که‌ره‌ ئه‌گه‌ر تاوات هه‌ورامی زاراوه‌ن ئه‌گه‌ر نه‌تاوات هه‌ورامی زوانا. من ده‌توانم له‌گه‌ڵ تۆ دا سۆرانی قسه‌ بکه‌م به‌س سۆرانی زاراوه‌یێکه‌ له‌ زمانی کۆردی.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر


آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :