تبلیغات
ڕۆجیاروو هه‌ورامانی - ژیونامه‌ ( 4) / ئیبراهیم شه‌مس
 
ڕۆجیاروو هه‌ورامانی
بنویسمێ به‌زوانی هه‌ورامی،بوانمێوه‌به‌زوانی هه‌ورامی که‌ئاڵاو قه‌ڵه‌می نه‌بڕیه‌ینه‌ باڵاوهیچ مێلله‌تێویه‌ره. محه‌مه‌دمسته‌فازاده
درباره وبلاگ


ڕۆجیاروو هه‌ورامانی په‌لیانێوه‌ی شه‌خسیه‌نه‌ که‌ دلێشه‌نه‌ ژیونامه‌و وێم ، هۆنیێ ، داستانێ گۆلالێ ، قسێ قه‌ذیمیا و هه‌رچێو ئاما سه‌روو ویر و ئاوه‌زیم منویسوو ئیشه‌ڵڵا وانه‌رێ ئازیزێ که‌ڵکش چنه‌ هۆرگێرا.

(ئیبراهیم شه‌مس)

ڕۆجیار = شمس



مدیر وبلاگ : نسیم هه‌ورامان

که‌لاسوو چواری بێنێ نه‌وه‌ش که‌وتا . وه‌ڵێنه‌ به‌رذانێشا په‌ی نه‌وسووذێ که‌ بێهداریش چنه‌ بێ دۆکترته‌شخیسش دا که‌ من حه‌سپه‌ما (‌په‌تا)  و مشیۆ بلوو نا‌وه‌شخانه‌نه‌ بووسوو . ساڵه‌و 1354 ی جه‌ نه‌وه‌شخانه‌و پاوه‌یه‌نه (1) ‌ وسنانێشا و نزیکه‌و مانگێوی چاگه‌ بێنێ و ئاذایچم لامه‌وه‌ بێ . چاگه‌ فره‌ چێوێم یاذ گێرتێ . به‌ تایبه‌ت پاسه‌بانێو خه‌ڵکوو ده گاو تشه‌ی به‌ نامۆ لاێق که‌ریمی (2) هام ته‌ختم بێ مه‌زانوو ناوه‌شیه‌که‌ش چێش بێ ئێننه‌ مزانوو جه‌ ڕۆنه‌ ویس سی نه‌فه‌رێ ئه‌ینێ په‌ی لایش . وه‌ختێو ته‌نیا‌ی بیه‌یانمێ داستانێم په‌ی گێڵنێوه‌ و فره‌ چێوێم نیشانه‌ دێدماو مانگێوی جه‌ ناوه‌شخانه‌نه‌ وه‌ردریانێ . بۆنه‌و ئانه‌یه‌ دۆکتری چه‌نیش په‌ی نویسه‌بێنێ و مشیایا دوێ مانگێ سه‌رجه‌م گرذ ڕوێ چه‌نێوه‌م شایا، مه‌دره‌کێ مه‌دره‌سه‌یم به‌رذێ په‌ی نۆدشه‌ی و چاگه‌ نام نویسیم که‌رذ .

ئه‌ذایم دانێ ته‌حوێڵوو واڵێـم و ئسپاراش چه‌مش چه‌ومه‌وه‌ بۆ . ئێتر که‌لاسوو چواریم جه‌ نۆدشه‌نه‌ جه‌ مه‌دره‌سه‌و ئۆلفه‌تیه‌نه‌ وانا. من تا ئا وه‌خته‌ دایێم شاگرذ ئه‌وه‌ڵ بێنێ به‌ڵام جه‌ نۆدشه‌نه‌ کۆڕێو بێ به‌ نامێ سه‌عدی مه‌حموودی (3) چا عه‌جایێباو ڕۆزگاریه‌ بێ. ئی کۆڕه‌ چنی گرذ که‌سی فه‌رقش بێ متاوو واچوو شش حه‌وت ساڵێ جه‌ هام سنعاو وێش وه‌ڵته‌ر بێ. ده‌رزوو ئینگلیسی چا ده‌وه‌نه‌ که‌لاسوو حه‌وتیه‌نه‌ ده‌س پنه‌ کریێ به‌ڵام ئی کۆڕه‌ ئێننه‌ ئینگلیسی زانێ ئێمه‌ فکر که‌رێنمێ مزانۆ به‌ ڕه‌حه‌تی قسێ که‌رۆ . معه‌لێمه‌که‌ما نامێش ئاغه‌ی خۆشڕه‌فتار (4)بێ خه‌ڵکوو ده‌گاو وه‌زڵیێ . ئی معه‌لێمه‌ سه‌عدیش فره‌ وه‌ش سیێ و دایمه‌ سۆعالێش چنه‌ په‌رسێ . منیچ ئاننه‌ش نه‌به‌رذ زرێنگی وێم نیشانه‌ داو دلێ دڵوو معه‌لێمه‌که‌یما ڕام که‌رذه‌وه‌.

زمسان و وه‌هاروو ئاساڵه‌یه‌ جه‌ نۆدشه‌نه‌ ده‌رزم وانا و قبووڵبیا . چی مۆدده‌نه‌ یانه‌و واڵێم بێنێ .ئاوه‌خته‌ واڵێم یه‌رێ زارۆڵێش بێنێ : خاتوونێ ، فاتمێ و کورش . من و خاتوونێ هام سنعێ بێنمێ و شۆتوو یۆترینیما وارذه‌بێ . پی بۆنه‌وه‌ واڵێم ئه‌ذایچم بێ. واڵه‌ زاکێم هامبازیێم بێنێ ئێمه‌ ئێننه‌ بازی که‌رێنمێ تا گرذێ شه‌که‌تی بێنێ و ئیژیێنێره‌ و منیچ په‌یشا یاسینی وانێنی . (ئیسه‌یچ دماو سی و چن ساڵا هه‌ر وه‌خت میاوو پنه‌شا ماچا لالۆ گیان وه‌شڵه‌ی پا وه‌ختیه‌.)

وه‌هارێ ئاخروو حه‌فته‌ی وێم ته‌نیا به‌ پای جه‌ نۆدشه‌نه‌ لوێنێوه‌ په‌ی شه‌ڕه‌کانی . ئیجا یانه‌یچما چا وه‌خته‌نه‌ مڵکه‌نه‌ بی و مڵکه‌که‌یچما هه‌ر پاسه‌ که‌ زووته‌ر واته‌نم پاینوو مڵکاو ده‌گایوه‌ بێ. جارجار وه‌ختێو یاوێنی مڵک ، شه‌وه‌ بیێبێره‌ . چا سنعه‌نه‌فکر نمه‌که‌روو هیچ زارۆڵێو تاوابۆش ئاننه‌ ڕا بڕۆ و جه‌ تاریکی و بێ ده‌نگی شه‌وێ نه‌ته‌رسۆ.

چوار مه‌تیێم جه‌ نۆدشه‌نه‌ بێنێ : مه‌تی حه‌نیفێ (ئه‌ذاو کاکه‌ نه‌سره‌دینی مه‌ککی) مه‌تی مه‌نیجێ (ئه‌ذاو کاکه‌ ئیسمه‌یلی ئیسماعیلی) مه‌تی کافیێ (ژه‌نه‌و لالۆ حه‌مه‌ ماقووڵی) و مه‌تی قه‌تتێ ( ئاذاو عه‌لی و مۆدریکی دلیری) من فره‌ته‌ر یانه‌و مه‌تی کافیێ لوێنێ نه‌ حه‌ر من به‌ڵکم گرذوو قه‌ومه‌کا ئانێ که‌ هامسنعوو من نه‌ختێو گه‌وره‌ته‌ر یا گۆلاله‌ته‌ر بێنێ دایمه‌ یانه‌و ئی مه‌تیێمه‌ بێنمێ . لالۆ حه‌مه‌ ماقووڵ پیایوی فره‌ عال و قسه‌ وه‌ش بێ یا خوا نوور وارۆ قه‌بره‌ش ڕه‌نگا گرذوو نۆدشه‌ی و فره‌و مه‌نته‌قه‌و هه‌ورامانی قسه‌ وه‌شه‌کێ لالۆ حه‌مه‌ماقووڵیشا ویرێ با . کۆڕێوو مه‌تیێم بێ به‌ نامێ جه‌هانبه‌خشی (ئیسه‌ ئه‌ره‌نیشته‌و شاروو سنه‌یا‌ ) چنی تاته‌یش ماجه‌ره‌یشا بێنی .(5)

 

مه‌تی کافیێم خوا عه‌فوه‌ش که‌رۆ ژه‌نێوه‌ی به‌ ته‌مام مه‌عنا بێ گرذوو ئێمه‌ش (واڵه‌زاکێش) پێسه‌و زارۆڵه‌کاو وێش وه‌شێ سیێنمێ . فره‌ ڕه‌حمینه‌ بی متاوو واچوو کانگاو محه‌به‌تی بێ . ئی ڕه‌فتاروو مه‌تیێمه‌ بیه‌بێ هۆو ئانه‌یه‌ گرێما چاگه‌نه‌ ڕاحه‌تێ بێنمێ . 

زارۆڵه‌کێ مه‌تیێم کۆڕ و کناچه‌ گرذێشا باسه‌واذێ بێنی و ئۆتاقێوه‌و ته‌به‌قه‌و واروو یانه‌که‌یشا که‌رذه‌بێشا کتیبجانه‌ و په‌ڕ بێ جه‌ کتیبێ جۆراجۆرێ.  ڕوێو کتیبێوم به‌ر ئارذ و ده‌سم که‌رذ ئه‌وه‌وه‌نه‌یش واتشا ئی کتیبه‌ هه‌ر که‌س بوانۆشه‌وه‌ شێت بۆ ! نامێ کتیبه‌که‌ی (امیر ارسلان نامدار ) بێ . (6) گۆشم نه‌ذانه‌و کتیبه‌که‌م به‌ دزی به‌رذ دلێ مڵکی و تا ئاخر واناوه‌ . ئینه‌ ئه‌وه‌ڵین کتیبێوی غه‌یر ده‌رزی بێ که‌ وانام. دماو ئانه‌یه‌ عه‌لاقه‌مه‌ندیم به‌ کتیب وه‌نه‌ی فره‌ بی و هه‌ر وه‌خت کتیبێوم دیایا به‌ تایبه‌ت داستانێوه‌م دیایا تا نه‌وانایامه‌وه‌ وازش چنه‌ نارێنێ.

یاذما ئا زه‌مانه‌ نۆدشه‌ برقش بێ وه‌روو ده‌گه‌ینه‌ پاڵوو مه‌دره‌سه‌که‌یما . پاڵێچشه‌نه‌ حه‌مامێو بێ هه‌م پیایانه‌ بێ هه‌م ژه‌نانه‌. ئیجا برقه‌که‌ وه‌ختوو مه‌غریبێ گیسیێنه‌ و تا نزیکوو چوار تا په‌نج سه‌عاتا گڕێ . گه‌رذ که‌س یه‌خچاڵش نه‌بێ و ئه‌گه‌ریچ بیه‌یا فه‌قه‌ت ده‌رذه‌و یه‌خی وه‌رێ چوون ئه‌گه‌ر چێوێوت په‌ی مۆددێوی فره‌ی نیایانه‌ یه‌خچاڵ زوو خرابیێ . بڕێو جه‌ مه‌رذمیچ ته‌له‌فزیۆنشا بێ ته‌له‌فزیۆنیچ ئا زه‌مانه‌ فه‌قه‌ت به‌رنامه‌ش شه‌وانی بێ . یانه‌و مه‌تی کافیێم جزوو ئا که‌سانه‌ بێنی که‌ ته‌له‌فزیۆنشا بێ و شلۆغی یانه‌یشا ڕه‌نگا یۆ جه‌ ده‌لیله‌کاش ئینه‌ بیه‌بۆ .

وه‌ختێو ئه‌ینی دلێ شاروو نۆدشه‌ی ، چا ئه‌وه‌ڵه‌وه‌ نویسیابێ (خوش آمدید) ئی که‌لیمێ به‌ ( تحول و تطور ) واڕیه‌یبێ به‌ ( خۆژامه‌دی ) ڕه‌نگا تا بیه‌بوو 15 ساڵه‌ هه‌ڵای نه‌فکریانێنێنه‌ که‌ چی ماچاش خۆژامه‌دی .

ئه‌وه‌ڵوو نۆدشه‌ی ده‌ره‌و به‌ره‌نۆی بێ. جه‌ ده‌ره‌و به‌ره‌نۆی هانه‌چه‌مێو بێ که‌س نه‌تاوێ نیم ده‌یێقێ ده‌سش وزۆنه‌. به‌ داخه‌وه‌ ئی هانه‌ چه‌مه‌ چێوێوش چنه‌ نه‌مه‌نه‌ن .

یانه‌و بابایم هانه‌و ده‌شتێ بی هانه‌و ده‌شتێ سه‌فه‌یوی تایبه‌تش بێ . هه‌ر چن ئیسه‌ به‌ داخه‌وه‌ دڵم ئه‌سڵه‌ن مه‌ذۆونه‌ په‌یش و هه‌رچی پاگه‌ره‌ ویه‌روو داخێم تازێ باوه‌.

ویرما نۆدشه‌نه‌  پیایوی دووکاندار بێ شه‌ربه‌ته‌ وره‌شێ . من گرذه‌ ڕوێ لوێنی و لاشه‌وه‌ شه‌ربه‌ته‌ ئه‌سانێنێ . ئیجا بۆ شه‌ربه‌ته‌کێ ئێننه‌ وه‌شه‌ بێ ئیسه‌یچ دماو ئاننه‌ ساڵاره‌ هه‌ڵای ویرم مه‌نه‌ن . چلێ هامنی چا دووکانه‌نه‌ وه‌روه‌ بی . ئی پیا گرذ ساعبێو لوێ جه‌ که‌له‌ته‌نگه‌نه‌ وه‌روه‌ ئارێ و شه‌ربه‌ته‌ی چیای وره‌شێ .ڕۆحش شاد که‌ منش وسانێوه‌ ویروو ئا ڕوا.

---------------------------------------------------------------------------------

1-  نا‌وه‌شخانه‌و پاوه‌ی جه‌ ساڵه‌و 1348 ی ڕۆجیاری که‌وته‌بێ کار  ئاوه‌خته‌ پێسه‌و ئیسه‌یه‌ نه‌بێ کرماشانه‌و ئیلا ته‌نیا نه‌وه‌شخانێو بێ که‌ ته‌جهیزاتی پزشکیش جه‌ ئیسه‌یه‌ فره‌ته‌ر بێ چن دانێ دۆکترێ هێندیێ و پاکستانیێش چنه‌بێنێ فره‌و عه‌مه‌ڵا جه‌ئۆتاق عه‌مه‌ڵشنه‌ کریێنێ . ئه‌گه‌ر ژه‌نێوه‌ پنه‌ گیریه‌یا و یا که‌سێو ئاپانتیسش ته‌قه‌یاوه‌ زوو نه‌ڕفانێنێش په‌ی جوانڕۆی. ئاخر ئاوه‌خته‌ جوانڕۆ هه‌ڵای نه‌بیه‌بێ شار بڵام ئیسه‌ به‌داخه‌وه‌ گرذ یاگێو بیه‌ن شار و پاوه‌ پا گرذه‌ وه‌ڵینه‌یشه‌وه‌ یاگێ وێشه‌نه‌ ته‌کانه‌ش نه‌واردێنه‌ و به‌ڵکم دماکه‌وته‌ته‌ر بیه‌ن. به‌ داخه‌وه‌ پا گرذه‌ وه‌ڵینه‌یه‌ که‌ نا‌وه‌شخانه‌و پاوی بێش ساڵه‌کا ته‌ر وه‌ختێو که‌ کناچه‌کێما په‌یذا بیه‌ ئه‌ذاش مشیه‌یا سه‌زاریه‌نش که‌رذه‌یا .من خیاڵ که‌رێنێ جه‌ پاوه‌نه‌ ئی عه‌مه‌ڵه‌ کریۆ و  پینه‌یه‌دڵنیابێنێ به‌ڵام وه‌ختێو که‌ پنه‌گیریا و به‌رذه‌م په‌ی بیمارستانی ، واتشا وه‌ڵڵا مشیۆ به‌ریش په‌ی کرماشانی چوون دۆکتری جه‌ڕاحما نیا. ئینه‌ په‌ی شاره‌که‌و ئێمه‌ یاگێ خه‌فه‌ت و شه‌رمه‌ساریه‌نه‌.

جه‌ ساڵه‌و 1358 کۆچی ڕۆجیاری جه‌ نه‌وه‌شخانه‌و پاوه‌یه‌نه‌ جه‌نگێوی قۆرس به‌ینوو ده‌وڵه‌تی و حێزبه‌ کۆرذیه‌کانه‌ کریا و پا‌وه‌ حیچ وه‌خت وێش نه‌ذا ده‌سوو حێزبه‌ کۆرذیه‌کاوه‌ و فه‌قه‌ت ناوه‌شخانه‌و پاوه‌ی که‌وت ده‌سشا بڕێو جه‌ نه‌وه‌شه‌کا تووشوو گێچه‌ڵێ گه‌ورێ بیێ و بڕێوشا به‌رذێشا په‌ی باینگانی. حه‌ر چی جه‌نگه‌نه‌ جه‌ ناوه‌شخانه‌نه‌ نزیکه‌و 15 که‌سا به‌ ده‌سوو په‌لامارده‌ره‌کا کۆشیه‌ی.

2-  لایێق که‌ریمی پاسه‌بان بێ و خه‌ڵکوو ده‌گاو تشه‌ی . دماته‌ر حه‌ر جه‌ ئێنقلابه‌نه‌ لوا دانشگا و ده‌رجه‌ش لوا سه‌ر تا به‌ ده‌ره‌جه‌و سه‌رهه‌نگی یاوا جه‌ ئاخرین مه‌سئوولیه‌تشه‌نه‌ ‌بێ ڕئیس شاره‌بانی پاوه‌ی . ئی شه‌خسه‌ ئه‌فسه‌رێوی فره‌ عال بێ . ڕوێو به‌ جل و به‌رگی نزامی لوانێ په‌ی ڵایش وێم معه‌ڕه‌فی که‌رذ ئه‌وه‌ڵ نه‌ژناسانێش دماوه‌ که‌ زاناش من کێنا فره‌ وه‌شحاڵ بی و ته‌حوێڵش گێرتا و واتش جار جار بۆ په‌ی لایم. به‌ داخه‌وه‌ ئی ئه‌فسه‌ره‌ وه‌شنامه‌ حه‌ر چا ساڵاو ئه‌وه‌ڵوو ئێنقلابیه‌ جه‌ ته‌مه‌نه‌و جوانیه‌نه‌ عه‌مره‌و خویش که‌رذ.

3- دۆکتۆر سه‌عدی مه‌حموودی جه‌ تاریخوو  شانزه‌و مانگه‌و پاژه‌ره‌ژوو 1345 ی ڕۆجیاری جه‌ شاره وه‌شڵانله‌‌که‌و نۆدشه‌یه‌نه‌‌ ئاما دنیا به‌ بۆنه‌و ئانه‌یه‌ پێسه‌و شه‌خسێوی نابێغه‌ی ساحیبوو هۆش و ویرێوی به‌رزی بێ و ئینه‌ جه‌ زارۆڵه‌ییشه‌نه‌ دیاریش دابێ، ساڵێو زووته‌ر جه‌ سنعه‌و وێش کیانیا په‌ی مه‌دره‌سه‌ی . ده‌ورانوو ئێبتێداییش جه‌ مه‌دره‌سه‌و ئۆلفه‌توو نۆدشه‌یه‌نه‌ ته‌مامنا و هه‌ر پاسه‌ ڕاهنمایی و ده‌بیرستانیچش حه‌ر چی شاره‌نه‌ وانا.  ئی شه‌خسه‌ ڕۆح سووکه‌ حه‌ر جه‌ ئا وه‌خته‌ که‌ زارۆڵه‌ بێ ئه‌ذاش به‌ خاتره‌و نه‌بیه‌ی دۆکتری جه‌ نۆدشه‌نه‌ گیانش جه‌ ده‌س دا هه‌ر چا وه‌خته‌ به‌ وێش و به‌ ڕۆحوو ئه‌ذایش قه‌وڵش دابێ بۆ به‌ دۆکتر تا ئا یاگه‌ پنه‌ش کریۆ جه‌ نه‌وه‌شیه‌کا و مه‌رگوو فه‌قیره‌کا که‌م که‌رۆوه‌.په‌وکی جه‌ ساڵه‌و 1365ی ڕۆجیاری به‌ ڕۆتبه‌و 9 ی علووم ته‌جرۆبی جه‌ کۆنکووره‌نه‌ قه‌بووڵ بی و جه‌ زانشتگاو تارانی ده‌سش که‌رذ به‌ وه‌نه‌ی ده‌رسی پزشکی تا ساڵه‌و 1372 ده‌رزه‌که‌ش ته‌مام که‌رذ و بی به‌ دۆکتر و دماو دوێ ساڵا سه‌ربازی جه‌ مه‌ریوانه‌نه‌ مه‌ته‌بش نیاره‌ و په‌ی خزمه‌ت که‌رذه‌ی خه‌ڵکی‌ فه‌قیر و که‌م ده‌سی ئانه‌ جه‌ ته‌وانشه‌نه‌ بێ که‌رذش . جه‌ ساڵه‌و 1375 ی ژه‌نیش ئارذه‌ که‌ نه‌تیجێش یه‌رێ کناچی به‌ نامه‌کاو : په‌ریا ، کیمیا و هێلیا بێ .

دۆکتۆر سه‌عدی دۆکتروو هه‌ژار‌ا و بێ ده‌ساڵاتا بێ هیچوه‌خت په‌ی زه‌ڕی کارش نه‌که‌رذ فره‌و وه‌ختا ناوه‌شێش به‌ هه‌زینه‌و وێش جه‌ ناوه‌شخانه‌نه‌ وسنه‌ینێ و عه‌مه‌ڵێش که‌رذێنێ. جه‌ کووچه‌و کۆڵانه‌کانه‌ هه‌ر وه‌خت لازم بیایا ناواشه‌کا وینێ و نۆسخه‌شا په‌ی نویسێ. دۆکتۆر سه‌عدی هیچوه‌خت هه‌رمانه‌ی سیاسیه‌ش  نه‌که‌رده‌ و نه‌لا ده‌وروو هیچ حێب و داروده‌سه‌یه‌نه‌ ته‌نیا ئامانجش خزمه‌ت که‌رذه‌ی به‌ ئێنسانیه‌تی بێ .

 به‌ داخێوه‌ی فرێ ئی پیا پایه‌ به‌رزه ‌جه‌ تاریخوو 1/9/1386 ڕۆجیاری  جه‌ ته‌مه‌نوو چل و یه‌ک ساڵه‌یه‌نه‌ به‌ بۆنه‌و ناوه‌شی قه‌لبی جه‌ ناوه‌شخانه‌و تارانیه‌نه‌ گیانی شیرینش جه‌ ده‌س دا. ڕۆحش شاذ. (ئی ژیونامه‌مه‌ جه‌ وتارێو که‌ کاکه‌ جه‌لال شه‌فێعی به‌ سۆرانی نویسته‌بێش هۆرم گێرته‌ن)

4- دماو سی و په‌نج ساڵا ڕوێو ئاغه‌ی خۆشره‌فتار ئاما ده‌فته‌ره‌که‌م هه‌رچن تا ئاڕوه‌ ئێتر نه‌ذیه‌بێم، تا چه‌مم پنه‌که‌وت ئژناسام هۆرسانه‌ی وه‌روو ده‌میش و ئێحترامێوی فره‌م په‌ی گێرت. واتم مژناسیم ؟ ماچۆ نامه‌کێت ئاشنانه‌ و قه‌یافه‌که‌یچت حه‌ر ئاشنان به‌ڵام نمه‌زانوو چکۆم دیه‌نی واتم سی و په‌نج ساڵێ چه‌یوه‌ڵ جه‌ نۆدشه‌نه‌ معه‌لێمم بیه‌نی. ئیجا ئاغه‌ی خۆشڕه‌فتار ئه‌سڵه‌ن دیمه‌نش نه‌واڕیابێ و ڕه‌نگا جه‌من جوانته‌ر ئرمانێ .

5- جه‌هانبه‌خشوو مه‌تیێم  بۆنه‌و قسه‌ وه‌شه‌کاشه‌وه‌ گروو نۆدشه‌ی مژناساش جار جار سه‌ره‌ش نیان سه‌روو لالۆ حه‌مه‌ ماقووڵی و ماجه‌ره‌یوه‌ وه‌شه‌ بیینه‌و ئی ماجه‌ره‌یچه‌ ده‌م به‌ده‌م دلێ خه‌لکی گێڵیه‌نه‌وه‌.

لالۆ حه‌مه‌ذ  زه‌مینێوش بۆ جه‌ سینه‌و ئاخربێنه‌ (سینه‌و ئاخر بێ ئینا شماڵوو شاروو نۆدشه‌ و په‌شته‌و هانه‌و ده‌بۆشته‌ی ) گرذ ساڵێو ئاخروو وه‌هاری تا ئه‌وه‌ڵوو پایزی چنی مه‌تیێم لواینێ چاگه‌ هه‌م ئاژه‌ڵداریشا که‌رذه‌ن و هه‌م مڵکێوی گۆلاله‌یچشا بیه‌ن و پێسه‌و هامنه‌ هه‌وارێوی چن خانه‌وادێ ته‌رێ ئاماینێ لاشا . ئیجا ڕاو هه‌ورامانوو ئه‌ودیمی یانێو ناوه‌ و نوێن و که‌لجی ، سلێنه‌و بڵبه‌ر پێگه‌ره‌ ڕه‌ذه‌ بیێنه‌ و ڕاویاری ئاگه‌یه‌ هه‌ر وه‌خت پاگه‌نه‌ ڕه‌ذێ بیێنی لاو مه‌تیێم و لالۆ حه‌مه‌ذی لاشا دان و نان و چایشا وارذه‌ن .

مانگه‌و پاژه‌ره‌ژی بۆ هه‌ڵای کۆچشا نه‌لابۆ سینه‌و ئاخر بێ لالۆ حه‌مه‌ذ ماچۆ گه‌ره‌کما هه‌رمانبه‌ر گیڕوو تا گزره‌که‌ی که‌نۆوه‌ . جه‌هانبه‌خش ماچۆ تاته‌ گیان من گه‌ره‌کما بلوو په‌ی تارانی و خه‌جیم گه‌ره‌کا بازه‌ وێم ملوو گزره‌که‌ی که‌نوه‌وه‌ زه‌ڕه‌که‌ی به‌ وێم ده‌. ماچۆ من جه‌ خوایم گه‌ره‌کا تۆ ئاننه‌ خیره‌تت که‌وته‌بۆنه‌  ده‌ی ڕۆڵه‌ لوه‌ وێت که‌نه‌ شه‌وه‌. جه‌هانبه‌خش ئاننه‌ حه‌وسه‌ڵه‌و کاریش نه‌بۆ و ملۆ چاگه‌ په‌ی وێش گنۆوه‌ پاڵێ و هه‌ر رۆێو مڵوێو گیواو که‌نه‌ۆوه‌ و ئێتر تا ئاخروو ڕۆی مووسۆ په‌یش . گرذه‌ڕۆێچ نان و چاشتش په‌ی مارا و حه‌ر چا واره‌نه‌ منیاشه‌ره‌ په‌یش . هه‌رمانبه‌ری مانیایچ ملۆ نان و چاشته‌که‌ی سێر موه‌رۆ هه‌مته‌ر گنۆوه‌ پاڵێ و ئینه‌ کارش بۆ تا حه‌فتێو . دماو ئه‌فته‌ی مه‌یوه‌ په‌ی نۆدشه‌ی جه‌ حاڵێوه‌نه‌ فه‌قه‌ت چوار مڵوێش که‌ننێنێ جه‌ چوار ته‌ره‌فوو زه‌مینه‌که‌یه‌نه‌ نیه‌ینێشه‌ره‌. ماچۆ تاته‌ گیان به‌خوا گیواوه‌که‌م جه‌ هه‌ر چوار ته‌ره‌فوو زه‌مینه‌که‌یه‌نه‌ که‌نه‌نه‌وه‌ ئیسه‌ زه‌ڕه‌که‌م ده‌ فره‌ دێرما . لالۆ حه‌مه‌ذیچ ماچۆ ده‌ی ڕۆڵه‌ بێقه‌زا بی زه‌ڕه‌ش مذۆ و جه‌هانبه‌خشیچ تا تاران ماتڵ مه‌بۆ . ئیجا دماو چننه‌ ڕوا لالۆ حه‌مه‌ذ ملۆ په‌ی سینه‌و ئاخر بێ تا گزره‌که‌ی پێچۆ وینۆ گیواو گرذ وشک بیه‌ن و ته‌نیا چوار مڵوێ کنیان منیشۆره‌ و ماچۆ ئه‌ی جوانه‌ مه‌رگ هه‌مته‌ر کڵاوه‌ت نیا سه‌ره‌م مه‌گه‌ر ده‌سم نه‌گنۆ ده‌سیت کارێوت پنه‌که‌روو بی به‌ په‌ننه‌و عاڵه‌می ؟ به‌ڵام جه‌هانبه‌خش تا ساڵێو نمه‌یوه‌ و وه‌ختێویچ مه‌یوه‌ ،  لالۆ حه‌مه‌ذ قینه‌کێش لاشیێنه‌.

6- ئی داستانێ میرزا محه‌مه‌دعه‌لی نه‌قیبۆلمه‌مالێک که‌ رازه‌وه‌گێڵنوو ناسره‌دینشای قاجاری بیه‌ن په‌ی ئاذێش گێڵناینه‌وه‌ و کناچێ شای که‌ دایمه‌ په‌شته‌و په‌رذه‌یه‌نه‌ په‌ی ئی ڕازێ گۆشش گێرته‌ن ، نویسێنه‌ش .

چکیاره‌و داستانه‌کێ پێسنه‌نه‌ : مه‌له‌کشای ڕوومی جه‌ جه‌نگێوه‌نه‌ کۆشیۆ . ژه‌نه‌کێش له‌مه‌په‌ڕه‌ بیێنه‌ به‌ره‌مشۆ و چنی خاجه‌ نه‌عمانی مێسری زه‌ماوننه‌ که‌رۆ. دما چن مانگاره‌ زارۆڵه‌که‌ش په‌یذا بۆ نامێش منیا ئه‌میر ئه‌رسه‌لان . ئی کۆڕه‌ فره‌ زه‌ریف و زرێنگ و نه‌ته‌رس بیه‌ن و گرذ که‌سی وه‌ش سیان . وه‌ختێو به‌ سنعوو جوانی میاوۆ ، مزانۆ تاته‌ش مه‌له‌کشا بیه‌ن .له‌شکه‌ر کێشۆ په‌ی روومی و ئاگه‌یه‌ گێرۆوه‌ و عه‌کسوو فه‌رۆخ له‌قای چاگه‌ وینۆ عاشقه‌ش بۆ ملۆ په‌ی فه‌ره‌نگی و تووشوو گێچه‌ڵێ فرێ مه‌ی و چنی دێو و درنجی گژیۆ خۆلاسه‌ به‌ دڵداره‌کێش میاوۆ و مه‌یوه‌ په‌ی وه‌ڵاته‌که‌و وێش.





نوع مطلب :
برچسب ها :
لینک های مرتبط :
پنجشنبه 23 آبان 1392 11:54 ب.ظ
سلام کاکه ئیبراهیم فره وه ش حال بیا ئامایدی په ی لاو ئیمه ده ستا وه ش بو
چهارشنبه 8 آبان 1392 11:25 ق.ظ
سلام بی قه زابی یاره بی ده ست وه ش بو قه لمت حه ر به رده وام بو
عه فوه که ره امکانش هه ن فونت کوردیه م ایمیل که ری په یی
uraman2013@yahoo.com
شنبه 4 آبان 1392 09:02 ب.ظ
از تک تک بازدیدات میتونی پول دربیاری !!! هر بازدید شما را با 30 ریال حساب میکنیم ! بالاترین در آمد ممکن را از ما بخواهید . برای ثبت نام و کسب در آمد عجله کنید.
شنبه 4 آبان 1392 08:59 ب.ظ
از تک تک بازدیدات میتونی پول دربیاری !!! هر بازدید شما را با 30 ریال حساب میکنیم ! بالاترین در آمد ممکن را از ما بخواهید . برای ثبت نام و کسب در آمد عجله کنید.
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر


آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :