تبلیغات
ڕۆجیاروو هه‌ورامانی - ژیونامه‌ ( 3) / ئیبراهیم شه‌مس
 
ڕۆجیاروو هه‌ورامانی
بنویسمێ به‌زوانی هه‌ورامی،بوانمێوه‌به‌زوانی هه‌ورامی که‌ئاڵاو قه‌ڵه‌می نه‌بڕیه‌ینه‌ باڵاوهیچ مێلله‌تێویه‌ره. محه‌مه‌دمسته‌فازاده
درباره وبلاگ


ڕۆجیاروو هه‌ورامانی په‌لیانێوه‌ی شه‌خسیه‌نه‌ که‌ دلێشه‌نه‌ ژیونامه‌و وێم ، هۆنیێ ، داستانێ گۆلالێ ، قسێ قه‌ذیمیا و هه‌رچێو ئاما سه‌روو ویر و ئاوه‌زیم منویسوو ئیشه‌ڵڵا وانه‌رێ ئازیزێ که‌ڵکش چنه‌ هۆرگێرا.

(ئیبراهیم شه‌مس)

ڕۆجیار = شمس



مدیر وبلاگ : نسیم هه‌ورامان
ساڵه‌و هه‌زار و یه‌ره‌سه‌ذ و په‌نجای لوانێ مه‌دره‌سه‌. (1) حه‌ر ئه‌جۆم ئارۆن ڕۆو ئه‌وه‌ڵوو پایێزی بێ پایێزوو ئه‌وسای پێسه‌ ئیسه‌یه‌ نه‌بێ یۆ هه‌ڵای جلێ هامنیش جه‌  مانگه‌و که‌ڵه‌هه‌رزیه‌نه‌‌ مه‌واڕۆ ئاوه‌خت مانگه‌و که‌ڵه‌هه‌رزی وه‌روه‌ زه‌مینه‌نه‌ بێ. چنی مامۆیم لوانی مامۆ جانڵڵام خوا عه‌فوه‌ش که‌رۆ یۆ جه‌ ئه‌وه‌ڵین سه‌واذداراو ده‌گه‌ی بێ و تا‌ که‌لاسو‌و ششیش وه‌نه‌‌بێ . مامۆم فره‌ سه‌واذش سه‌ره‌وه‌ بێ کتیبێ فرێچش بێنێ من حه‌ر جه‌ زارۆله‌یه‌نه‌ عه‌لاقێوی تایبه‌تیم به‌ کتیب و مه‌دره‌سه‌ی په‌یذا که‌رده‌بێ. زارۆڵێ ڕه‌فێقێ من ئیجێشا مه‌دره‌سه‌ یاگێوه‌ی ته‌رسناکه‌نه‌ و په‌وکی ملا مه‌دره‌سه‌ تا مه‌عه‌لێمێ به‌ تووڵه‌ کۆشاشا . ڕۆ ئه‌وه‌ڵوو مه‌دره‌سه‌ی زارۆڵێ که‌لاس یه‌کێ به‌ گره‌وه‌هۆڕه‌ ئه‌ینێ په‌ی مه‌دره‌سه‌ی به‌ڵام من ئاڕوه‌ چنی مامۆیم بێنێ و زانێنێ مه‌عه‌لێم فه‌قه‌ت‌ زارۆڵه‌ی ته‌مه‌ڵی کۆشۆ و ئه‌سڵه‌ن نه‌ته‌رسانێ. یومین مه‌عه‌لێمم نامێش ئاغه‌ی خۆدادادی بێ مه‌زانوو خه‌ڵکوو کۆگه‌ی بێ به‌ڵام هه‌ر یاگێو هه‌ن خوا موانه‌تیش دۆ .
با باسوو مه‌دره‌سه‌یتا په‌ی که‌روو . مه‌دره‌سه‌و شه‌ڕه‌کانی دلێڕاسه‌و ده‌گه‌ینه‌ و پاڵوو سووره‌چناروو لاو پلوورێنه‌ بێ . دوێ ئۆتاقێش بێنێ و هه‌ر ئۆتاقێوه‌ په‌ی سی نه‌فه‌را مێز و نیمکه‌تش چنه‌ نریابێره‌ که‌لاس یه‌ک و یه‌رێ و چوار پێوه‌ره‌ بێنێ و کلاس دوێ و په‌نجیچ پێوه‌ره‌.  سؤبێوش چنه‌ بێ که‌ به‌ هێزمێ گڕێ (ئاوه‌خته‌ هه‌ڵای سۆبه‌ی نه‌وتین باوش نه‌بێ) پایێز و زمسان ئێمه‌ مه‌جبوورێ بێنمێ هێزمێ بارمێ په‌ی مه‌دره‌سه‌ی .گڕذ ساعبێو هه‌ر زارۆڵێو هێزمێو ده‌سشه‌وه‌ بێ و چنی وێش حه‌ر پێسه‌ کتیبی ئارێش په‌ی مه‌دره‌سه‌ی. هه‌ر پاسه‌ سمه‌رێ و مه‌کی په‌ی بان تلنایچ مشیه‌یا مه‌حه‌سڵی ئارذه‌یاشا. هه‌مکه‌لاسیه‌کێ من ئینێ بێنێ :

1- که‌ریم خه‌سره‌وی کۆڕوو حاجی ئه‌ڵڵا مراذی ئێمه‌ هامسه‌ی بێنمێ واعزه‌و ئاذێشا وه‌شه‌ بێ و من چوون زارۆڵه‌ بێنێ جار جار لۆێنێ یانه‌شا و حه‌ر چاگیچه‌ نان وه‌رێنێ که‌ریم فره‌ زرێنگ بێ  دایمه‌ جه‌ ده‌رسه‌نه‌ چنی من په‌ی ئه‌وه‌ڵی و دومی مسابێقه‌نه‌ بی به‌ڵام من هه‌ر گیز جه‌ مه‌دره‌سه‌نه‌ نه‌بیادوم  . ئێمه‌ دماوه‌ یانه‌ما ئاماپاوه‌ و که‌ریم حه‌ر جه‌ زارۆڵه‌یه‌نه‌ تاته‌یش ژه‌نیش په‌ی ئارذو تووشوو که‌ڵفه‌تی فره‌ی ئاماو ژه‌نیش ته‌ڵاقه‌ داو ژه‌نێوه‌ته‌ره‌ش ئارذه‌ و ئینه‌ ماجه‌راو که‌ریمی بێ که‌ تا که‌لاسوو ده‌ی فره‌ته‌رش نه‌وه‌ن.2- سبحان سه‌عدی ئاد لوا ده‌رسش ته‌مامنا و ئیسه‌ جه‌ کرماشان مامۆساو مه‌دره‌سه‌یا 3- ته‌حسین ڕه‌حمانی ئاذێچ ده‌رسش ته‌مه‌نا مامۆساو مه‌دره‌سه‌یا 4- نه‌سره‌دین محه‌مه‌دی نه‌تاواش ده‌رسه‌که‌یش ته‌مامنۆ و ئیسه‌ کارێگه‌رێوی زه‌حمه‌تکێشا 5- فارووق قانێع ده‌رسش ئاست جیا و لواشۆنه‌و ده‌رسی دینیه‌ره‌ و بی به‌ مامۆسای ئایینی هه‌ر چن به‌ ته‌مامی نه‌وه‌نش 6- سڵێمان ڕه‌حمانی ده‌رسش ته‌مامنا و بی به‌ مامۆساو مه‌دره‌سه‌ی و ئیسه‌ ئینا مه‌ریوان و جه ویه‌روو ‌ شێعر‌ێچه‌نه‌ ده‌سش هه‌ن 7- تاهێر محه‌مه‌دی کۆڕوو لالۆ تۆفێقی که‌ هه‌ر به‌ جوانی عه‌مره‌و خواێش که‌رذه‌ . 8- مۆختار ئه‌حه‌دی ئیسه‌ کامه‌ندو ئامووزش و په‌روه‌رشیا 9- ئه‌فراسیاو ئه‌حمه‌دی ده‌رسه‌که‌ش نه‌ته‌مامنا و ئیسه‌ ئینا شه‌ڕه‌کان 10- فارۆق حه‌یده‌ری ئاذیچ ده‌زه‌که‌ش نه‌ته‌مامنا و ئینا شێرکه‌ته‌نه‌

ئه‌جۆم دوێ یه‌رێ ته‌رێ بێنێ نیه‌نێ یاذمه‌نه‌ بێجگه‌ چینیشا نزیکه‌و په‌نج کناچایچ هه‌مکه‌لاسێما بێنێ که‌ په‌ی ئه‌وه‌ڵساڵی جه‌ شه‌ڕه‌کانه‌نه‌کناچێ ئه‌ینێ مه‌دره‌سه‌. 

هه‌ر پاسه‌ که‌ وه‌ڵێنه‌ واتم ، تاته‌م شێرکه‌ته‌نه‌ کار که‌رێ واعزه‌و کاریش خاسه‌ بیێبێ. ساڵێوشا زه‌ڕێوی فره‌ش ئارذه‌و مه‌ڵکێوش ئه‌سا یانه‌که‌یچما ته‌به‌قێوش پنه‌ زیاذ که‌رذ وه‌ڵێنه‌ یانه‌ما دوه‌ نۆهۆم بێ چیرش گه‌وڕوو گاوا بێ و جه‌ سه‌ریچه‌و که‌ فه‌قه‌ت ئۆتاقیوه‌ و هه‌یونێوه‌ش بێ ئێمه‌ نیشێنمێره‌ ئا ته‌به‌قه‌ که‌ وه‌ش کریا یانه‌که‌ما ڕه‌نگه‌و یانه‌یش به‌ وێش گێرته‌. ئامڵکه‌ما که‌ ئه‌سا، نامێش شمقاڕ بێ . شمقاڕ که‌وته‌بێ ئاخروو مڵکاو ده‌گه‌یوه‌ و چه‌سپیابێ به‌ مڵکوو جوانمیره‌ی. جوانمیره‌ گه‌وره‌ته‌رین مڵکوو شه‌ڕه‌کانیا ئاوه‌خت ساحیبه‌که‌ش ئه‌مین به‌گ بێ که‌  مڵکه‌که‌ش دابێ ده‌سووحاجی ئه‌ڵڵا مراذی سه‌رپه‌رێسێش که‌رۆ. ڕه‌نگا  شش یه‌کوو ئاوه‌و جوه‌و مزرا په‌ی ئی مڵکیه‌ لوێ.

ئێمه‌ جه‌ مانگه‌و پاژه‌ره‌ژی (اردیبهشت) کۆچ که‌رێنمێ مڵک و تا ئاخروو مانگه‌و گه‌ڵاخه‌زانی چاگه‌ بێنمێ .یاذما جه‌ مڵکه‌که‌مانه‌ که‌یڵێوی عالما وه‌ش که‌رذ. ئۆساکه‌ما ئۆسا مووسا  (2)بێ . ئۆسا مووسا مدده‌و چل ڕوا په‌ی ئێمه‌ کارش که‌رذ هه‌ر چی تڵانێچ بێنێ گرذش نیه‌یوه‌.

 

****

تاته‌م  گرذوو مڵکه‌که‌یش که‌رذ هه‌ناری که‌مێویچ وه‌زی و هه‌نگووری و هه‌نجیری و ساوی و چڵێویچ به‌یه‌ بێ . دلێ مڵکه‌که‌یمانه‌ مه‌ڕێوه‌ گۆلانجڵێچ بێ به‌ نامێو که‌شکه‌مه‌ڕێ هه‌ر وه‌ختێو گه‌مه‌ که‌رێنمێ و واران ئامایا ، خزێنمێنه‌ دلێش. ویرما جه‌ گۆشه‌و مڵکه‌که‌یماوه‌ زه‌مینم ساف که‌رذه‌ بی و چن ده‌گه‌ی و جاذێوی پێچ پێچم وه‌ش که‌رذه‌بێ و حه‌رچی ماشینله‌ شڕێ فڕه‌دریه‌ی دلێ ئێشغاڵدانیو ده‌گا‌ی بێنێ (لاو له‌وازی) گرذێم گلێرێ که‌رذێبێنه‌ی نه‌یبێنێم دلێ جاذه‌که‌یم.  هه‌ر وه‌ختیچ ڕه‌فێقێم ئامه‌یانێ ئینه‌ بازیو ئێمه‌ بێ.

ئینه‌ خاتراتوو چل ساڵێ چه‌ی وه‌ڵته‌ریا و من دماته‌ر یانێو جه‌ دوانزه‌ ساڵه‌یه‌نه‌ جه‌ شه‌ڕه‌کانه‌نه‌ زیاناوه‌و ئێتر نه‌لاناوه‌ په‌ی ئاگه‌ی به‌ڵام هه‌ڵای فره‌و چێوا ئینه‌ی یاذمه‌نه‌ . ویرما مڵکه‌که‌ما (شمقاڕ) هامساو ئی مڵکا بێ : ده‌راسووری مڵکوو لالۆ عه‌وده‌ی ، جوانمیره‌ حاجی ئه‌ڵڵا مراذ سه‌رشه‌وکار که‌رێ ، شۆڵگا هینوو لالۆ حامێذ و لالۆ ئه‌لمه‌مه‌ی بێ و گه‌رماویچ هینوو ده‌روێش ماعیه‌دینی بێ.

حاجی ئه‌ڵڵامراذ کۆرێوش بێ ها‌م سنعوو من به‌ نامێو که‌ریمێ . من و که‌ریم دایمه‌ پێوه‌ره‌ بێنمێ هه‌م جه‌ مڵکه‌نه‌ و هه‌م جه‌ ده‌گانه‌ چوونکای جه‌ ده‌گایچنه‌ یانه‌که‌ما ته‌قابێ پێوه‌.

شۆڵگا ئاخرین مڵکوو شه‌ڕه‌کانی بێ. زه‌مینه‌که‌ش خڕ بێ و ئاوی فرێش گه‌ره‌که‌بێ په‌ی دارای . ساحیبه‌که‌ش لالۆ ئه‌ۆلمه‌مه‌ پیا‌یوی زه‌حمه‌ت کێش و فه‌قیرحاڵ بێ خاس ئینا یاذمه‌نه‌ دایمه‌ جه‌ وه‌ختوو نۆباویش خاکه‌نازێوش ده‌سه‌و بێ و ئی سه‌ر و ئه‌وسه‌رووجوه‌و مزرا  (3)که‌رێ و دژمانی دێ پاکه‌سا ئاوه‌کێشا بڕیێنه‌ره‌.

 

-------------------------------------------------------------------

 

1-           مه‌دره‌سه‌ی ده‌وڵه‌تی په‌ی یه‌که‌م که‌ڕه‌تی جه‌ ساڵه‌و ‌ 1339 ی کۆچی ڕۆجیاری جه‌ ده‌گاو شه‌ڕه‌کانیه‌نه کریاوه‌ و مامؤساکێچش ئاغه‌ی محه‌مه‌د ئه‌مین جه‌میلی و ئاغه‌ی ئه‌وڕه‌حیم خالدی هه‌روێ خه‌ڵکوو نۆدشه‌ی بێنێ . (ئینه‌ نیشانه‌ مذۆ نۆدشه‌ جه‌ ویه‌ره‌و دانش و سه‌واذیه‌نه‌ نه‌سڵێو وه‌ڵێو ئه‌و ده‌گاکاو هه‌ورامانی بیه‌ن ) حه‌ر جه‌ ئا ساڵێنه‌ نزیکوو سی که‌سێ نام نویسی کریه‌ی و ده‌سشاکه‌رذ به‌ ده‌رس وه‌نه‌ی . پاسه‌ گێڵناوه‌ په‌ی نام نویسی ته‌مه‌ن مهێم نه‌بیه‌ن و زارۆڵه‌ی گۆلاله‌ تاته‌یش به‌ باوشی ئاره‌نش و کۆڕی هه‌رزه‌کاریچ دلێشانه‌ بیه‌ن. کاکه‌ سابیر سه‌عیدی شاعێر یۆ چا زارۆڵه‌ گۆلالا بیه‌ن که‌ جه‌ په‌نج ساڵه‌یه‌نه‌ ده‌سش که‌رذه‌ن به‌ ده‌رس وه‌نه‌ی. چێگه‌نه‌ پنه‌م وه‌شا نامێو چن نه‌فه‌را که‌ ئه‌وه‌ڵین مه‌حه‌سڵێ مه‌دره‌سه‌و شه‌ڕه‌کانی بیێنێ نامێشا بنویسوو: 1- ئه‌وڕه‌حیم سه‌لاحی 2-عیزه‌ت که‌ریمی 3- مه‌هدی خه‌سره‌وی 4- عه‌بدلقادر قادری 5- مه‌حموود مه‌حموودی 6- سه‌فه‌ر ڕۆسته‌م پوور 7- جه‌لال ڕه‌حیمی 8- جانڵڵا شه‌مس 9- ئه‌لیاس محه‌مه‌دی 10- جه‌زا حرمه‌تی 11- سه‌عڵڵا عه‌بدڵڵاهی 12- مۆمن محه‌مه‌دی  13- شه‌وکه‌ت عارفی  ... و که‌سانێوته‌ر که‌ به‌ داخه‌وه‌ نه‌یا هۆشم . چی که‌سا یه‌ره‌ نه‌فه‌روو ئه‌وه‌ڵی ده‌رسشا تا دانشسه‌را ته‌مامنا و بیی مامۆسا و مه‌دره‌سه‌ی ئامه‌یوه‌ ئه‌و شه‌ڕه‌کان  وهه‌ر ئاذێ بیێ که‌ بنه‌ڕه‌توو عێلم و سه‌واذیشا جه‌ شه‌ڕه‌کانه‌نه‌ نیاره‌ .خاسا یاذێو که‌روو جه‌ کاکه‌ عیزه‌تی که‌ریمی که‌ جه‌ ساڵه‌کاو ئه‌وه‌ڵوو ئێنقلابی گیانی شیرینش دا ڕاو ئاڤو خاکێشه‌نه‌ هه‌ر پاسه‌ کاکه‌ شه‌وکه‌ت عارفی و کاکه‌ مه‌حموود مه‌مه‌حموودی و مامۆی ئازیزم مامۆ جانڵڵا شه‌مس که‌ یاذش تا ئاڕوه‌ مروو ئینا خاتره‌مه‌نه‌ .

 

2-     - ئۆسا مووسا کۆڕوو خه‌ڵیفه‌ مه‌جیذی یانه‌ش جه‌ سه‌راوننوو ده‌گه‌یوه‌ بێ. ئی پیا ئۆسادیوارێوی فره‌ قابل بێ و فره‌ته‌روو یانه‌کاو ده‌گاو شه‌ڕه‌کانی ئاذی وه‌شێ که‌رذێنێ.یاذما شه‌وێوه‌ جه‌ شه‌وه‌کاو وه‌هاری (به‌ نه‌زه‌ره‌م ساڵه‌و 54ی بێ) وارانێوی فره‌ وارا و لافاوێوی گوره‌ هۆرس و هه‌رچی تل و تاش بێ چنی وێش ئارذ ئه‌ڵبه‌ت چوون ده‌ره‌و شه‌ڕه‌کانی فره‌ قووڵا ، حیچ مۆشکێلێوه‌ په‌ی ده‌گه‌ی ناما وه‌ره‌و به‌ڵام نیمه‌ شه‌و گرذو خه‌ڵکوو ده‌گا‌ی به‌ ده‌نگێوی فره‌ سامناک جه‌ وه‌رمه‌نه‌ چڵاکیا‌یره‌ و زاناما تاشێوی فره‌ زلی چن ده‌تۆنی جه‌ سه‌روو ده‌گه‌ینه وازیاوه‌ و‌ پڕتافیه‌نه‌نه‌ ده‌ره‌ و ئیسه‌یچه‌ هه‌ڵای چاگه‌نه‌ مه‌نه‌ن. حه‌ر ئه‌چی شه‌وێنه‌ چن تاش و ته‌وه‌نێ ته‌رێ که‌وتێنه‌ دلێ ده‌گه‌ی به‌ڵام ڕه‌حموو خوای به‌ کسی هیچ ناما. یۆ چا تاشا که‌وته‌نه‌ یانه‌و لالۆ مووسای و نزیکه‌و ساڵێوی هه‌ر پاسه‌ مه‌نه‌وه‌.جه‌  ئه‌وه‌ڵوو ئێنقێلابی (هه‌ڵای ئێنقلاب نه‌بیه‌بێ) ڕوێو لالۆ مووساو ژه‌نه‌کێش و یۆ جه‌ کۆڕه‌کاش یانه‌نه‌ نه‌بێنێ (لوه‌ی بێنێ دۆکتر په‌ی نه‌وسووذێ) یۆ جه‌ کۆڕه‌کا چێوێو پێسه‌و نارنجه‌کی مارۆوه‌ یانه‌ و ئه‌وێچێ گرذ مه‌یا ده‌ورش گێرا  (چوار کۆڕێ و کناچێوه‌ و وه‌یوێوه‌شا) چی حه‌ننانه‌ ئاچێوه‌ ته‌قۆوه‌و گرذی کۆشۆ . ڕه‌نگا ئا ڕوه‌ سه‌ختته‌رین ڕۆ جه‌ تاریخوو شه‌ڕه‌کانیه‌نه‌ بێ . من ئۆسا مووسام دی به‌ ده‌ساو وێش گرذوو زارۆڵه‌کاش که‌فه‌ن که‌رذێ و نیه‌یش قه‌بره و ناشۆکریێو ده‌مشه‌نه‌ ناما  ‌. من ئی ئیمان و باوه‌ڕه‌ قۆره‌سه‌و ئۆسا مووسایمه‌ به‌ چه‌موو وێم دی.

 

3-           حه‌کایه‌ته‌و جوه‌و مزرا هاڵی جه‌ لۆتفی نیه‌نه‌ : جوه‌و مزرا جوێوه‌ی گه‌ویێنه‌ که‌ جه‌ سه‌رچه‌مه‌و ئه‌سڵیو ده‌گاو شه‌ڕه‌کانی به‌ نامێ سه‌روو پلوورێ ده‌س پنه‌ که‌رۆ و  جه‌ ده‌ره‌و ئاساوی ویه‌رۆ  و جه‌ سه‌روو سووڵێنه‌ که‌ نزیک به‌ ویس گه‌زێ به‌رزاییش هه‌ن ، پڕۆره‌ و ته‌ماموو مڵکه‌کا جه‌ بنجۆنه‌ تا شۆڵگا به‌ درێژاو چوار کیلوومێترا  ئی مه‌سیرا ملۆ (نساره‌و مزگی ، سووراویه‌ ، ئه‌سپه‌گلێر ، نه‌ره‌لاره‌ ، به‌نووروا، ،ده‌ره‌و زه‌ردی بنی . دوه‌ته‌وه‌نله‌  ، به‌نوومه‌رێ، مریه‌م که‌ ، مڵکووئاڵتوونێ ، سه‌رووسه‌لمانی ، ده‌راو سووری و شۆڵگا  )و ئاوه‌و گرذوو ئا مڵکا و ئا مڵکێچه‌ ئینه‌ی وارتوره‌و، دارۆ . ئه‌وسا هه‌ر که‌سێو لوا‌یا داواو ژه‌نێ په‌رسێنێش چنه‌ ئایا جه‌ وه‌روو جوه‌و مزرا مڵکش هه‌ن یا نیاش. ئه‌وسا  خه‌ڵکی فره‌ ئێحتراموو ئاوێ گێرێنێ و هیچوه‌خت سه‌روو ڕه‌یوه‌ ئاوه‌کێ پیسه‌ نه‌که‌رێنێ جه‌ گرذوو مڵکه‌که‌نا حه‌وزێو وه‌ش که‌رێنێ و ئی ئاوێشه‌ وزێنێنه‌ و هه‌ر چانێ وه‌رێنێ.ئی جوێ فره‌ قه‌ذیمیه‌نه‌ و ڕه‌نگا تاریخش گێڵۆوه‌ په‌ی ئه‌وه‌ڵین نه‌سڵێو که‌ چی ده‌گانه‌ لیوه‌ینێ و به‌ په‌یلواو من گیڵوه‌ په‌ی وه‌ڵی ئێسلامی.

ئیجا هه‌میه‌توو ئی جوێ که‌ من چی ژیونامه‌مه‌نه‌ گه‌ره‌کما ئێننه‌ باسش که‌روو ، ئینا جه‌ شیوه‌و ئاودارایشه‌نه‌ (سیستم پیچیده‌ آبیاری) . ماچا ساحیبێ ئه‌سڵی مڵکاو شه‌ڕه‌کانی یانێوی نۆ نه‌فه‌ره‌ بیه‌ن که‌ گرذوو مڵکه‌کاشا به‌ینوو وێشانه‌ به‌شه‌ که‌رذه‌ن  ئی نو نه‌فه‌ره‌ ئینێنێ : ( بابه‌ ، مام یۆنس ، حه‌مزه‌ ، کافره‌ڵڵا ، که‌یگارا ، یاعیشا ، میراوا ، سووراوا ، شابان) بابه‌ ساحیبی ئه‌سڵی و تاته‌و ئه‌ویشا بیه‌ن. ڕۆ ئه‌وه‌ڵوو ساڵێ تازێ نۆبه‌و ئاوه‌و (بۆباو) بابه‌ی بیه‌ن. دماو ئاذیه‌وه‌ کۆڕه‌کێش شۆنیشه‌ره‌ بێنێ تا نۆ ڕوه‌ ته‌مامیۆ  شه‌وێچش حه‌ر پی ده‌ستووره‌ بیه‌ن و گرذوو مڵکه‌کا داریه‌ینێ . ئی سیستمه‌ ڕه‌نگا گێلۆوه‌ په‌ی دوێ هه‌زار ساڵا  . جه‌ زه‌مانوو ده‌ره‌به‌گایه‌تیه‌نه‌ گه‌ره‌کشا بێ ئی شێوه‌یه‌ به‌ قازانجوو وێشا واڕا به‌ڵام نه‌تیجێش فه‌قه‌ت سه‌رونه‌ شیویای بێ و دماو مانگێوی ئامه‌یوه‌ سه‌روو ڕه‌وتی وه‌ڵینی.

یۆ جه‌ دۆسه‌ ئازیزه‌کام کاکه‌ وه‌حید خۆسره‌وی باسوو ئی جوێشه‌ ئارذه‌ن سه‌روو نه‌زموو شێعرێ من تیکێوش چێگه‌نه‌ منیه‌وره‌

ئه‌ر  ملکت هه‌ن و ساحیب ئاوه‌نـی 

ئیجــاره‌نشیـــن یــا میـــــراوه‌نـــی

 لازم بــزانــه تــه‌قسیمــوو ئـــا وێ 

تا چــه‌نی هــام ماڵ نه‌بۆت ئاژاوێ

 وه‌ش که‌ردن ته‌قسیم قه‌دیمی زانا 

ئاوه‌و جوه‌و مزرای پای ناسڵه‌ دیماینا

خــانــه وادێوی نـۆ نــه‌فــه‌رێنێ  

بـه وه‌شی حه‌یات به سه‌ر بورێنێ

بــه سـه‌رو «بابه ی» نو به‌شا بڕیه‌ن

ته‌قسیموو ئاوێ په‌ی وێشـا که‌رذه‌ن

نۆباوه‌و نـوبـــاو  چـه‌نــی «سووراوا»

«یــاعیشــــا »جــه به‌ین ئاخر «میراوا»

  « کافراله» و «شعبان» چه‌نی «کیگارا»

«حمزه»و «مام یونس»  په‌ی تۆم ژمارا

    بــابــه نـــۆبــاوو  ملکــــوو ئـاڵتوونێن

هـه‌م ده‌راسووری هه‌م به‌نو مه‌رێن

     ســووراوا شـۆڵگـا ی ئـاوی دارانـێ

ده‌ره‌و زه‌ردی بنـــی  نیمــاو که‌رانێ

ڕۆ میـراو مزران ده‌س ته‌ڕ نه‌که‌رذه‌ن

به نـوورواو واری په‌ی ئاو قــڕ که‌رده‌ن

چــــه‌م و نسارو ئـــا ملـــگا تۆڵه‌

رۆ هــه‌مزه‌ی دارێ و ئا چــه‌م و دۆڵه‌

یــاعیشــــا بــه نوو مــه‌رێ سیــــراوا

پیشــــــاوش یــاوو هــــه‌تا جـــــــۆراوا

که‌یگارا و شعبــــان دوڵه‌و گــه‌رماوی

لــــــوه ئــــاوی داره هـــه‌تــا متــــاوی

جوانمیره‌ی سه‌رمه‌س ئاوێش فرینێ

یـاعیشـــــا و مـامــێ یـونسـام ویرێنێ

وه ختـوو کافـراله ی دوڵه‌و هامسانی

شـه‌و سیـــراو که رۆ هـــه‌تا به یانی

ئـافــه‌رین بــه تۆ قه‌ذیمی زانا

تــۆ ئــــی عیلمتــــه جه لا و کـێ وانا

سه‌د ساڵێ(وه حید)چنی دۆسا مدرا

مـه‌که‌را ته‌قسیم ئاوه‌و جوه‌و مزرا






نوع مطلب :
برچسب ها :
لینک های مرتبط :
 
لبخندناراحتچشمک
نیشخندبغلسوال
قلبخجالتزبان
ماچتعجبعصبانی
عینکشیطانگریه
خندهقهقههخداحافظ
سبزقهرهورا
دستگلتفکر


آمار وبلاگ
  • کل بازدید :
  • بازدید امروز :
  • بازدید دیروز :
  • بازدید این ماه :
  • بازدید ماه قبل :
  • تعداد نویسندگان :
  • تعداد کل پست ها :
  • آخرین بازدید :
  • آخرین بروز رسانی :